Ўзбекистонда коронавирус беморларини шифохонадан ташқарида даволаган тиббиёт ходимлари суд орқали жавобгарликка тортилиши белгиланган эди. Вазирликнинг Коронавирусга қарши кураш штаби аъзоси Барно Абдусаматова «Ўзбекистон 24»га берган интервьюсида бу борада изоҳ берди.
«Ушбу буйруқ асосан уйда нотўғри даволаш натижасида келиб чиққан асоратлар бўйича маълумотлар тўпланган ҳолда чиқарилган эди. Шуни тушунтириб ўтмоқчиманки, уйда даволаниш бекор қилингани йўқ. Касалликнинг енгил даражасида уйда даволаниш тавсия этилади ва бу жараённи поликлиникадаги амбулатор шифокорларимиз олиб бормоқда», — деган у.
Барно Абдусаматованинг таъкидлашича, хусусий клиникаларга ҳам коронавирус беморларини даволашга рухсат берилган, шифокорлар онлайн тартибда ҳам беморларга ўз тавсияларини бериши мумкин, лекин бу вазирлик ишлаб чиққан тавсияларга мос бўлиши керак.
«Амбулатор шароитга, саралаш ва тақсимлаш марказларига ҳамда стационар шароитга беморларнинг жуда оғир аҳволда келгани, уларнинг инъекцион ва инфузион терапияларни уйда олишгани ва нотўғри тавсиялар берилгани буйруқ чиқарилишига сабаб бўлди», — дейди штаб аъзоси.
Унинг қўшимча қилишича, агар шифокорлар даволашни Соғлиқни сақлаш вазирлиги тасдиқлаган тавсиялар асосида олиб борса, уларга ҳеч ким даволашни ман этмаган.
Эслатиб ўтамиз, Ўзбекистонда коронавирусдан уй шароитида даволанаётганларга тиббий ёрдам бериш учун мобил гуруҳлар ташкил этилган, 5 июлдан бошлаб коронавирусга чалинган айрим тоифа беморлар ўз уйида даволаниши мумкинлиги белгилаб қўйилган.
ССВ COVID-19’ни амбулатор ҳамда уй шароитида даволаш юзасидан тавсиялар ишлаб чиққан, ундан аввал Коронавирусга қарши курашиш штаби аъзоси Барно Одилова уйда даволанаётган беморлар парваришида аҳамият берилиши керак бўлган жиҳатларга тўхталганди.
Изоҳ (0)