Тошкент вилоятининг Янгийўл туманида 9 август куни икки ёшли Умиджон Рихситиллаев йўқолиб қолгани ва унинг жонсиз танаси 12 август куни Янгийўл тумани, «Мирзабобоев» МФЙдан оқиб ўтувчи Жўнариқ каналидан топилгани ҳақида хабар берилганди.
Тошкент вилояти ҳокимлиги томонидан маълум қилинишича, Янгийўл шаҳрининг 4 та маҳалласини кесиб ўтган Жўнариқ канали 2019 йилда таъмирланган. Лойиҳа бўйича канал атрофига ҳимоя тўсиқлари ўрнатилиши белгиланган.
Янгийўл шаҳар ҳокимининг капитал қурилиш, коммуникациялар ва коммунал хўжалиги масалалари бўйича ўринбосарининг маълум қилишича, каналнинг узунлиги 7 километрни ташкил қилади. 2019—2020 йилларда каналнинг 3,8 километри бетонлаштирилган.
Ҳоким ўринбосарининг сўзларига кўра, таъмирлаш ишлари Сув хўжалиги вазирлиги томонидан ажратилган маблағлар ҳисобидан «Янгийўл махсус сув пудрати» давлат унитар корхонаси томонидан амалга оширилган.
Қайд этилишича, канал атрофига тўсиқ ўрнатиш ишлари амалга оширилади ва қолган 3,2 километр қисмини бетон қилиш ишлари давом эттирилади.
Изоҳ (0)