Қибрай туманидаги ер майдонларни хатловдан ўтказиш давом этмоқда. Бу ҳақда «Давергеодезкадастр» қўмитаси ахборот хизмати маълум қилди.
Маълум қилинишича, Тошкент вилояти Қибрай туманининг умумий ер майдони 55 978 гектарни ташкил этади. Ундан 18 308 гектари қишлоқ хўжалиги ерлари, 4 465 гектари томорқа ерлари, 461 гектари ўрмонзорлар, 6628 гектари канал, йўл, бино ва ҳовли билан банд ерлар ҳамда 26 114 гектари бошқа ерлар ҳисобланади.
Ердан фойдаланиш ва уни муҳофаза қилиш назорат бошқармаси бошлиғи Фарҳод Тўхташев хатлов жараёни босқичлари бўйича маълумот берди.
«Хатлов жараёнида биринчи босқичда жойга чиққан ҳолда тўлиқ ерлар хатловдан ўтказилади. Иккинчи босқичда камерали ишлар олиб борилади. Унда ер майдонлари ҳисобланиб, ҳуқуқий ҳужжатларга асосан солиштириб кўрилади. Учинчи босқичда тайёр бўлган маълумотлар геопорталга жойлаштирилади», – дейди Фарҳод Тўхташев.
Мониторинг гуруҳи мутахассиси Жамшид Мухторов биринчи босқичда амалга ошириладиган ишлар билан таништириб ўтди.
«Қибрай тумани мавзеларида ходимлар контрма-контр юриб, ўзгаришларни харитага тушириб, боғлар, узумзорлар ва аҳоли пунктларини жойида кўриб чиқиб, ноқонуний ҳолатларни харитага белгилашади», – дейди Жамшид Мухторов.
Мутахассиснинг таъкидлашича, бу фақат инсон омили билан бажарилмайди. GPS навигатори, дронлар ва космик хариталардан фойдаланилади.
Мониторинг гуруҳининг яна бир мутахассиси Исломов Дилмурод хатловнинг иккинчи босқичи ҳақида маълумот бериб ўтди.
«Иккинчи босқичда тузилган хариталар ташкил қилинган штабга олиб борилади. У ерда мутахассислар бирга Arges дастурига тушириб чиқяпмиз. Ҳар бир фойдаланувчининг ер майдони, ҳар бир контрнинг экин майдони бўйича чегаралари, текшириш давомида аниқланган ноқонуний ерларни туширамиз. Бу ишларни амалга ошириб бўлганимиздан сўнг геопорталга жойланади».
Қайд этилишича, Arges дастурида қайта ишланган маълумотлар учинчи босқичда геопорталга жойланади. У ерда ҳуқуқий ҳужжатлар, ҳар бир ер майдони ва унумдор ерлар ҳақидаги маълумотларни тўлиқ билиб олиш мумкин.
Қибрай туманидаги хатлов ишлари бир ойда якунланиши режалаштирилган.
Изоҳ (0)