Давлат тест маркази белгиланган тартибда рўйхатдан ўтган, аммо тест синовларида иштирок этиш учун тўловни тўлиқ амалга оширмаган абитуриентлар томонидан кўплаб мурожаатлар келиб тушгани туфайли давлат комиссиясининг 2-сонли баёнига мувофиқ 2020/2021-ўқув йили қабулида белгиланган тартибда рўйхатдан ўтган, аммо тест синовларида иштирок этиш учун тўловни амалга оширмаган абитуриентларга 2020 йил 16 августга қадар тўловни амалга ошириш учун имконият яратилганини хабар қилди.
Тест синовларида иштирок этиш учун тўловни белгиланган муддатда амалга оширмаган абитуриентлар 2020 йил 16 август соат 23:59 га қадар тўловни амалга ошириши мумкин.
ДТМ маълумотига кўра, 2020 йилда жами 1 484 085 нафар абитуриент рўйхатдан ўтган. Бунда тўловни амалга оширмаган абитуриентлар ҳам ҳисобга олинган.
Тўловни амалга оширмаганлар рўйхатдан ўтмаган ҳисобланади ва тест синовларида иштирок эта олмайди.
2020 йилда Ўзбекистондаги олий таълим муассасаларига (ОТМ) бакалавриат босқичига 162 364 та, магистратурага 10 425 та ўрин ажратилган. Кириш имтиҳонлари икки сменада республика бўйича танлаб олинган 155 та стадионнинг 40 тасида ўтказилади.
Ўзбекистонда иккинчи мутахассисликка ҳужжатлар қабул қилиш жараёни 2020 йилнинг 10 августидан бошланган, олий ўқув юртларига кириш тест синовлари 2 сентябрдан бошланиб, 14 кун давом этади, бакалавр босқичининг 1, 2, 3, 4-босқич талабаларига ҳозирча сентябрь ойидан бошлаб масофавий таълим бошланади.
Республика Таълим муассасаларига ўқишга қабул қилиш бўйича Давлат комиссиясининг қарорига мувофиқ, тест синовлари билан бир қаторда касбий (ижодий) имтиҳонлар ўтказиладиган бакалавриат таълим йўналишлари бўйича касбий (ижодий) имтиҳонлар аввалги йилларда олинган мос фан бўйича тест синовлари билан алмаштирилган.
Аввал абитуриентларга ҳар 30 та тест топшириғини ечиш учун (жавоблар варақасини тўлдириш билан бирга) 90 дақиқа вақт ажратилиши (60 та тест топшириғига жами 180 дақиқа берилади) ҳақида хабар қилинганди.
Тест синовлари билан бир қаторда касбий (ижодий) имтиҳонлар ўтказиладиган бакалавриат таълим йўналишлари бўйича касбий (ижодий) имтиҳонлар аввалги йилларда олинган мос фан бўйича тест синовлари билан алмаштирилган абитуриентларга муайян таълим йўналишига кириш учун тест топширадиган фанлари мажмуаси ва кетма-кетлиги бир хил бўлган қўшимча тўрттагача бакалавриат таълим йўналишларини 2020 йил 16 августга (16 август куни ҳам) қадар танлаш ҳуқуқи берилган.
Изоҳ (0)