Тошкент шаҳри чегараларини ўзгартириш режаси қайта кўриб чиқилади

Тошкент шаҳри ва Тошкент вилоятининг чегарадош туманлари ҳудудларини ўзгартириш лойиҳаси қайта кўриб чиқилади. Бу ҳақда Ўзбекистон ҳукумати ва пойтахт ҳокимлигидаги ахборот манбаларига таяниб, «Gazeta.uz» хабар бермоқда.

Президент Шавкат Мирзиёев 5 август куни Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишганди. Президент матбуот хизмати аҳолига қулайлик яратиш мақсадида Тошкент шаҳридан Тошкент вилоятига 1010 гектар, вилоятдан пойтахтга 10196 гектар ер майдони ўтказилиши режалаштирилаётгани ҳақида хабар берганди.

Қурилиш вазири Ботир Зокиров пойтахтнинг Сергели, Чилонзор ва Учтепа туманларидан бир қисми, шунингдек, Мирзо Улуғбек тумани таркибидаги Улуғбек шаҳарчасини Тошкент вилояти ҳудудига ўтказиш таклиф этилаётганини маълум қилган.

Тошкент шаҳрининг ҳудудлари ўзгариши мўлжалланаётган маҳаллалари аҳолиси ушбу таклифга қарши чиққан. Хусусан, Учтепа тумани ва Улуғбек шаҳарчаси аҳолиси уларнинг яшаш ҳудудлари Тошкент вилояти таркибига ўтказилишига норозилик билдирган. Учтепа ва Сергели туманларида аҳоли кўчага йиғилиб, мутасаддилардан изоҳ талаб қилган.

Учтепа тумани ҳокими Фарҳод Абдуллаев аҳоли билан учрашувда шаҳар чегараларини ўзгартириш таклифи ҳали лойиҳа эканини таъкидлаб, ушбу масалани Тошкент шаҳар ҳокими Жаҳонгир Ортиқхўжаев билан муҳокама қилишга ваъда берган.

11 август куни пойтахт ҳокими билан бўлиб ўтган учрашувда иштирок этган «Ўрикзор» маҳалла фуқаролар йиғини раиси аҳолига видеомурожаатида «ҳудуднинг бир метри ҳам Зангиота туманига ўтмайди», деди. «Gazeta.uz» мухбирига берган интервьюсида у мазкур маълумотни тасдиқлаган ва лойиҳа кечиктирилганини айтган.

Нашрнинг Тошкент шаҳар ҳокимлиги ва ҳукуматдаги манбалари лойиҳа қайта кўриб чиқилишини тасдиқлаган, аммо бунинг қачон амалга ошиши ва қандай ўзгаришлар бўлиши ҳозирча номаълум.

Қурилиш вазирлигининг билдиришича, ўзгартириш лойиҳаси Тошкент ҳокимлиги томонидан тайёрланган. Пойтахт маъмуриятидан расмий изоҳ олишнинг иложи бўлмаган.

Чегараларни ўзгартириш тартиби

«Gazeta.uz»нинг ёзишича, Олий Мажлис Сенати 7 август куни «Ўзбекистон Республикасининг маъмурий-ҳудудий тузилиши тўғрисида»ги қонунни маъқуллаган. Президент томонидан имзоланиши керак бўлган мазкур қонунга кўра, вилоят бўйсунувидаги шаҳарлар, Тошкент шаҳри туманлари ва вилоятлар туманларининг чегараларини ўзгартириш ҳокимлар сўрови асосидаги Вазирлар Маҳкамасининг таклифи билан Олий Мажлис томонидан амалга оширилади.

Тегишли вилоят ёки Тошкент шаҳар ҳокими Вазирлар Маҳкамасига қуйидаги ҳужжатларни тақдим этади:

• шаҳар, Тошкент шаҳри тумани ёки вилоят туманининг чегарасини ўзгартириш зарурати ва мақсадга мувофиқлиги асосланган сўров;
• вилоят ёки Тошкент шаҳар халқ депутатлари кенгашининг шаҳар, пойтахт тумани ёки вилоят тумани чегараларини ўзгартириш масаласини кўриб чиқиш ҳақидаги қарори;
• ҳоким томонидан тузилган комиссия хулосаси;
• шаҳар, Тошкент шаҳри тумани ёки вилоят туманининг чегаралари ва чегаралари ўзгартириладиган маъмурий-ҳудудий бирликлар чегараларининг картографик кўриниши, шаҳар, Тошкент шаҳри тумани ёки вилоят туманининг чегара чизиқларини акс эттирган ҳолда;
• шаҳар, Тошкент шаҳри тумани ёки вилоят туманининг чегаралари ўзгариши билан боғлиқ тегишли ҳисоб-китоблар ва харажатларни молиялаштириш манбалари.

Қонунга кўра, Вазирлар Маҳкамаси бир ой муддатда ҳокимнинг сўровини кўриб чиқиши ва уни маъқуллаши ёки рад этиши керак. Сўров маъқулланган тақдирда, ҳукумат 10 кун муддатда парламентга кўриб чиқиш учун ҳужжатлар билан бирга шаҳар, Тошкент шаҳри тумани ёки вилоят туманининг чегараларини ўзгартириш ҳақидаги таклиф ҳамда Қонунчилик палатаси ва Сенат қарорлари лойиҳаларини киритади.