Ўзбекистондаги барча ФҲДЁ бўлимларида 2020 йил 1 сентябридан бошлаб туғилиш билан боғлиқ комплекс давлат хизматларини кўрсатиш тартиби йўлга қўйилади. Бу ҳақда Давлат хизматлари агентлиги хабар берди.
Маълум қилинишича, синов тариқасида Тошкент шаҳрида жорий этилган ушбу имкониятдан 300 нафарга яқин фуқаро фойдаланишга улгурди.
Мазкур тартибга кўра, эндиликда
- шифохонадан туғилганлик ҳақидаги тиббий маълумотнома олиш;
- ФҲДЁ органида туғилганликни қайд этиш;
- поликлиникага ҳисобга қўйиш;
- бир марталик нафақа пулини олиш;
- яшаш жойи бўйича рўйхатга қўйиш;
- болани давлат боғчасига навбатга қўйиш электрон тартибда амалга оширилади.
Янги тартибга кўра, биргина ФҲДЁ органига бориб, сўровнома тўлдиришнинг ўзи етарли. ФҲДЁ органи туғилганлик ҳолатини қайд этади ва бошқа давлат хизматларидан комплекс тарзда фойдаланишни таъминлайди. Бунда барча ҳаракатлар электрон тизим орқали амалга оширилади.
Ушбу давлат хизматларини комплекс тарзда кўрсатиш реал вақт режимида фақатгина ФҲДЁ органининг ўзида кўрсатилади.
Кўрсатилган ҳар бир давлат хизмати натижаси бўйича фуқароларга SMS хабар бериб борилади. Бу эса давлат хизматлари кўрсатиш жараёнидан фуқароларнинг хабардор бўлишини таъминлайди.
Изоҳ (0)