Филадельфияда Хитой собиқ ташқи ишлар вазири ва Шанхай мэри Чэнь Ига тегишли 1966 йилда ишлаб чиқарилган Mercedes-Benz 600 LWB Pullman «Four Door» лимузини сотувга қўйилди, деб хабар беради Carakoom.
Чэнь И ушбу автомобилни 1960 йиллардаги ҳукумат режаси доирасида буюртма қилган бўлиб, бундан мақсад автомобиль дизайни ва техник қисмларини ўрганиш ва якунда лимузиннинг хитойча версиясини яратиш бўлган. Pullman «Four Door» лимузинларидан жами 304 нусха ишлаб чиқарилган бўлиб, шулардан иккитаси Хитойга юборилган.
Эълонда автомобиль қачон яна Қўшма Штатларга импорт қилингани тўғрисида маълумот берилмаган, бироқ таъкидланишича, лимузин дастлабки ҳолатидагидек сақланган ва ҳеч қачон реставрация қилинмаган. Машина ҳозирга қадар 21 186 километр йўл босган.
Mercedes-Benz компанияси 600 моделларини 1963 йилдан 1981 йилга қадар ишлаб чиқарган. Лимузин кузовидаги версияси ҳукумат амалдорлари орасида, айниқса, Германияда жуда оммалашган. Лимузиннинг махсус версиясидан ҳатто Рим папаси ҳам фойдаланган.
Тўрт эшикли лимузиндан ташқари, олти эшикли вариантлари ҳам ишлаб чиқарилган. Ҳар иккала лимузинга ҳам 247 от кучи ва 500 Нм айланувчи моментга эга 6,3 литрли V8 двигателлари ўрнатилган.
Сотувга қўйилган лимузиннинг ташқи кўриниши ва интерьери идеал ҳолатда сақланган. Бироқ салондаги чарм қопламаларнинг айрим қисмлари емирилган. Сотувчи ушбу машина учун 285 минг доллар сўрамоқда.
Изоҳ (0)