Транспорт вазирлиги томонидан ишлаб чиқилган «Давлат ҳокимияти ва бошқаруви органларида хизмат автотранспортларидан фойдаланиш тизимини тубдан такомиллаштириш чора-тадбирлари тўғрисида»ги Президент қарори лойиҳаси жамоатчилик муҳокамасига қўйилди.
Унга кўра, давлат идоралари ходимлари ва ҳайдовчиларга хизмат автомобилларидан ишдан ташқари вақтда, шахсий ёки бошқа мақсадда фояланиши тақиқланиши мумкин.
Хусусан, автомобилларни GPS тизими орқали кузатиш таклиф қилинмоқда. Шунингдек, ҳужжат лойиҳасида ташкилотлар кесимида хизмат автотранспортлари сони, йўл босиш йиллик лимитининг белгиланган меъёрларга мувофиқлигини, ёнилғи сарфи, автомобиль маркаси ва ишлаб чиқарилган йили ҳисобини юритиш имкониятини берувчи дастурий таъминот ишлаб чиқиш ва амалиётга жорий этиш ҳам кўзда тутилган.
Бундан ташқари давлат ҳокимияти ва бошқаруви органларида хизмат автотранспортларининг сони, йўл босиш йиллик лимитининг белгиланган меъёрларга мувофиқлигини доимий мониторинг қилиш ҳамда унинг натижаларини ҳар чорак якуни бўйича ўзининг расмий веб-сайтида жойлаштириб бориши белгиланмоқда.
Қарор лойиҳасида қайд этилишича, мазкур ҳужжат Давлат ҳокимияти ва бошқаруви органларида хизмат автотранспортларидан фойдаланиш самарадолигини ошириш, бюджет маблағларидан оқилона фойдаланиш ҳамда давлат мулкидан фойдаланиш устидан назоратни кучайтиришни таъминлаш мақсадида қабул қилинади.
Ҳужжат лойиҳасининг муҳокамаси 2020 йил 27 августгача давом этади.
Изоҳ (0)