Бош вазири Абдулла Арипов иштирокида Сўх туманида бўлиб ўтган фаоллари йиғилишида 2020 йил 8 августда қабул қилинган «2020—2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари тўғрисида»ги Президент қарорида белгилаб берилган вазифалар муҳокама этилди. Бу ҳақда Сўх тумани ҳокимлиги ахборот хизмати хабар қилган.

Фото: Сўх тумани ҳокимлиги ахборот хизмати

Хабарда қайд этилишича, Президент топшириғи асосида Сўх туманидаги муаммоларни ҳал этишга эътибор қаратилиб, ҳар бир маҳалла, ҳар бир хонадон ўрганиб чиқилган.

Аҳоли, ёшларнинг бандлигини таъминлаш бўйича амалга оширилган ишлар натижасида уч мингдан ортиқ ишсизларнинг бандлигини таъминлашга эришилган. 345 нафар фуқаро Тошкент шаҳридаги йирик қурилиш ташкилотларига, 995 нафар киши тумандаги муаассасаларга доимий ишга жойлаштирилган.

Ички йўлларни таъмирлаш учун 18 миллиард сўм маблағ сарфланган. 15 мингдан ортиқ истеъмолчиларнинг электр таъминоти яхшиланган. 20 километр ичимлик суви тармоғи тортилган. Ҳудудларда алоқа сифатини яхшилаш мақсадида 74 километрли оптик тола тармоғи тортилиб, 5 та база станцияси ўрнатилган. Ҳушёр массивидаги фойдаланилмаётган 200 гектар майдон ўзлаштирилган.

8 августда қабул қилинган Президент қарори эса бу ишларнинг мантиқий давоми бўлади. Қарор билан тасдиқланган 2020—2021 йилларда Сўх туманини комплекс ижтимоий-иқтисодий ривожлантириш чора-тадбирларининг манзилли дастурига 146 та лойиҳа киритилган ва унинг ижросига 639 миллирад сўм маблағ сарф этилади.

Йиғилишда мазкур ишлар натижасида 11 мингдан ортиқ аҳоли учун янги иш ўринлари яратилиши кўзда тутилгани, саноат, хизматлар ва қишлоқ хўжалигини ривожлантириш бўйича 95 та лойиҳани амалга ошириш ҳисобига 5000 та янги иш ўрни яратилиши таъкидлаган.

Шунингдек, қарорда Йўл-транспорт, муҳандислик-коммуникация ва ижтимоий инфратузилмани ривожлантириш борасида 160 километр шағал қопламали йўлларни цементобетон қопламага ўтказиш ва асфальт қоплама ётқизиш, 106 километр тупроқ йўлларни шағал қопламага ўтказиш ва 40 километр цементобетон пиёдалар йўлакларини қуриш белгиланган.

Бош вазир раҳбарлигида ўтган йиғилишда республика ишчи гуруҳи томонидан мутасадди раҳбарлар иштирокида дастур доирасида амалга оширилаётган ҳар бир лойиҳанининг ўз муддатида ва сифатли амалга оширилишини таъминлаш ва бажарилган ишларни мунтазам муҳокама қилиб бориш топширилди.

Фото: Сўх тумани ҳокимлиги ахборот хизмати

Маълумот учун, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳолиси ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетган. Сўх тумани ҳокимлиги маълумотларига кўра, ҳодиса оқибатида 187 нафар ўзбекистонлик тан жароҳати олган, Ўзбекистон ҳудудидаги учта хонадонда ёнғин чиққан. Қирғизистоннинг Боткен вилоятида уй ва омборхона ёниб кетган.

Ушбу ҳолат юзасидан 1 июнь куни Ўзбекистон бош вазири Абдулла Арипов Ўзбекистон—Қирғизистон чегарасида қўшни мамлакат ҳукумати раҳбари билан учрашди. Бундан ташқари, Президент Шавкат Мирзиёев Қирғизистон президенти Сўронбой Жээнбеков билан телефон орқали мулоқот қилди.

Мазкур воқеалар ортидан Ўзбекистон ҳукумати аъзолари ҳудуддаги муаммоларни ўрганиш учун 2 июнь куни у ерга ташриф буюрди. Сўх туманига янги ҳоким ва ички ишлар бўлимига янги раҳбар тайинланди.

Шундан сўнг туманга бўлган эътибор сезиларли даражада кучайди. Хусусан, Фарғона вилояти Сўх туманига замонавий тиббиёт ускуналари етказиб берилди, электр таъминотини яхшилаш учун 79 километр узунликдаги электр узатиш кабеллари юборилди, 230 нафар сўхлик Tashkent City’даги қурилиш ишларида қатнашиш учун олиб келиниши маълум қилинди, туманда 3 та дам олиш маскани яратилиши таъкидланди, 71 км оптик толали алоқа кабеллари тортилди ва 5 та мобил алоқа база станциялари ўрнатилди ва сўхлик битирувчиларга ОТМларга киришда 500 та давлат гранти квотаси ажратилди.