Тошкентда автомашинани фоизсиз сотиш шарти билан фуқароларни алдаб, пулларини ўзлаштирган фирма фаолияти фош этилди. Пойтахт ИИББ матбуот хизмати хабарига кўра, 2020 йилнинг март ойидан буён ушбу фирма фаолиятидан 150 нафардан ортиқ фуқаро шикоят қилган.
Терговга қадар текширувда аниқланишича, 36 ёшли Отабек И. ва 34 ёшли Михаил Ш. 2019 йилнинг 23 августида Шайхонтоҳур туманида лизинг фаолияти билан шуғулланиш учун «Auto Makon» МЧЖга асос солган.
Фирма ходимлари шартнома тузиб, янги автомобиль учун деб мижозлардан алдов йўли билан пул олган. Раҳбарият эса уни ўз эҳтиёжлари учун сарфлаб юборган.
«Auto Makon»нинг ижтимоий тармоқлардаги саҳифаларида 12 майдан бошлаб қўйилган маълумотга кўра, мижозларга автомобилларни брендига қараб ҳеч қандай фоизларсиз, 36—48 ой давомида бўлиб тўлаш шарти билан 20—25 фоиз дастлабки тўловни амалга оширган ҳолда сотиб олиш таклиф қилинган. ИИББ хабарида қайд этилишича, шартномада автомобиль етказиб берилиши керак бўлган сана ҳам, қолган пулларни тўлаш муддати ҳам кўрсатилмаган.
Бош прокуратура ҳузуридаги Иқтисодий жиноятларга қарши курашиш департаменти томонидан «Auto Makon» компанияси мансабдор шахсларига нисбатан Жиноят кодексининг 168-моддаси (фирибгарлик) 4-қисми билан жиноий иш қўзгатилган.
Аввалроқ 19,3 минг нафар фуқароларнинг жами 54,3 миллиард сўм миқдордаги пулларини фирибгарлик йўли билан қўлга киритганликда айбланаётган «Авто 60 ой» МЧЖ мансабдор шахсларига нисбатан суд иши бошлангани хабар берилган эди.
Шунингдек, «Авто рентал» номи остида фаолият юритган корхона қулай шартларда, ҳеч қандай фоизларсиз, 40 ой давомида бўлиб тўлаш шарти билан енгил автомобиллар етказиб беришни таклиф қилиб, 700 га яқин фуқароларнинг ишончига кирган ва умумий ҳисобда қарийб 3 миллиард сўм маблағни ўзлаштириб олганди.
Изоҳ (0)