Ўзбекистонда карантин чекловларини юмшатиш доирасида театрлар, кинотеатрлар, концерт заллари фаолиятига ва бошқа тадбирларни ўтказишга рухсат берилиши кутилмоқда. Бу ҳақда Президент Шавкат Мирзиёев раислигида 12 август, чоршанба куни бўлиб ўтган йиғилишда маълум қилинди.
Президент матбуот хизмати томонидан таъкидланишича, йиғилишда телевидение ва радиода маданий-маърифий, кўнгилочар кўрсатув ва эшиттиришларни кўпайтириш, ижтимоий масофани сақлаган ҳолда театр, кино, концерт ва бошқа тадбирларни ташкил этиш масаласига ҳам эътибор қаратилди.
«Карантин талаблари юмшатилаётган бўлса-да, барчамиз ижтимоий масофани сақлаш, ниқоб тақиш, дезинфекция ва бошқа санитария-гигиена талабларига сўзсиз амал қилишимиз, илгари йўл қўйган хатоларни такрорламаслигимиз керак. Худога шукур, ҳаммамиз ҳам етарли тажриба орттирдик. Кўпни кўрган халқимиз жуда катта матонат ва қаҳрамонлик, тиббий маданиятини намоён қиляпти. Темир интизом, қаттиқ чидам ва сабр-тоқат билан биз, албатта, бу синовларни тез орада енгиб ўтамиз. Мен бунга қатъий ишонаман», — дея таъкидлади Президент.
Шунингдек, йиғилишда 15 августдан автомобилларнинг кун давомида ҳаракатланишига, 17 августдан вилоятлараро қатнашга, 15 августдан 30 кишилик тўйларни ўтказишга рухсат берилиши, 20 августдан буюм бозорлари ва савдо мажмуалари қайта ишга тушиши маълум қилинди.
Эслатиб ўтамиз, Ўзбекистонда коронавирус аниқланганидан кейин театрлар, кинотеатрлар, концерт заллари ёпилганди.
Изоҳ (0)