Ўзбекистонда 11 август соат 17:00 ҳолатига кўра, коронавирус инфекцияси қайд этилганлар сони 31747 нафарни ташкил этмоқда. Бу ҳақда Соғлиқни сақлаш вазирлиги хабар бермоқда.
Кун давомида айни пайтгача 443 кишида COVID-19 аниқланди. Шунингдек, 11 август куни 712 нафар бемор коронавирусдан соғайди.
Тошкент шаҳрида 526 нафар, Тошкент вилоятида 136 нафар, Андижон вилоятида 17 нафар, Наманган, Бухоро ва Қашқадарё вилоятларида 10 нафардан, Фарғона вилоятида 3 нафар бемор касалликдан фориғ бўлди.
Шу тариқа Ўзбекистонда 23704 нафар коронавирус инфекциясига чалинган фуқаро соғайиб, даволаниш кўрсаткичи 74 фоизга етди. Охирги марта 16 июнь куни даволаниш кўрсаткичи 74 фоиз бўлган, ўшанда коронавирус аниқланганлар сони 5493 нафар эди. 16 июндан кейин даволаниш кўрсаткичи мунтазам равишда тушиб, 21 июлда 53 фоизни ташкил этаётганди.
«Ҳозирда мамлакатимизда 7839 нафар беморга шифокорларимиз томонидан белгиланган стандартлар бўйича даво чоралари кўрилмоқда», — дейилади ССВ хабарида.
29 июль куни беморлар сони 9500 дан ортиқ эди. 30 июлдан бошлаб даволанаётган беморлар сони камая бошлади. Уч ҳафта ичида биринчи марта касаллар сони 8000 нафардан камайди.
Аммо 20 июлда 7760 нафар бемор коронавирусдан даволанаётганида уларнинг 1,3 фоизи оғир аҳволда эди, ҳозирда эса ҳар бешинчи (беморларнинг 21 фоизи) беморнинг аҳволи оғир.
ССВ ҳисоби бўйича 204 нафар, «Дарё» ҳисоби бўйича 213 киши коронавирус асоратларидан вафот этган.
Изоҳ (0)