Хотинини чавақлаб ўлдирган самарқандлик эркак лезвия билан ўз жонига қасд қилди. Тирик қолган эр қасддан одам ўлдиришда айбланмоқда

Самарқанд шаҳрида яшовчи эркак турмуш ўртоғини ўтин майдалаш учун мўлжалланган болта билан уриб ўлдирди. Сўнгра лезвия билан қўл томирини кесиб, ўз жонига ҳам қасд қилди. Бу ҳақда вилоят прокуратурасига таяниб, «Дарё» мухбири хабар берди.

Таъкидланишича, 2020 йилнинг 7 августидан 8 августига ўтар кечаси, соат тахминан 02:00 да Самарқанд шаҳар ФВБ ЁХБ навбатчилик қисмига шаҳарнинг «Ўрта Хўжасоат» маҳалласидаги уйларнинг бирида ёнғин содир бўлгани ҳақида хабар келиб тушган. Ўт ўчириш гуруҳи ушбу хонадонга етиб бориб, алангани сўндирганидан сўнг, ҳовлидан аёл кишининг мурдаси чиққан.

Мазкур ҳолат юзасидан тезкор-тергов гуруҳи ташкил этилиб, ҳодиса жойи кўздан кечирилганда, ҳовлининг ўрта қисмидаги йўлакдан топилган мурда бошининг юқори қисмидан тўртта ва ўнг қўл билак-тирсак қисмидан битта санчиб кесилган, суяк соҳалари парчаланган ҳолда топилган. Жасаднинг шахсига аниқлик киритилганда, у шу хонадон бекаси Ж.М. эканлиги маълум бўлган.

Самарқанд вилоят прокуратураси ахборот хизматининг «Дарё»га маълум қилишича, хонадон кўздан кечирилганда қуриб битказилмаган ҳожатхона ичкарисидаги темир бочкадан иккала қўлларининг билак қисми кесилган, кийимлари ва танаси қон билан беланган, ўнг қўлининг бош бармоғи билан кўрсаткич бармоғи орасига лезвия ушлаган, ҳушсиз ҳолдаги эркак киши топилган. Аниқланишича, у марҳумнинг турмуш ўртоғи М.М. бўлган.

Олиб борилган терговга қадар текшириш давомида М.М. олдиндан давом этиб келган оилавий низо оқибатида расмий ажрашмаган, аммо бир рўзғорда яшамаган турмуш ўртоғи Ж.М.ни ёғоч дастали ўтин майдалаш учун мўлжалланган болта билан бош қисмига тўрт маротаба, ўнг қўл билак-тирсак қисмига бир маротаба уриб, чавақлаб ўлдирган.

М.М. содир этган ўта оғир жинояти изларини яшириш мақсадида ҳовлидаги елим идишда бўлган бензинни яшаш хоналарининг ички ва ташқи томонларига сепиб, ўт қўйиб юборган. Жиноят қуроли ҳисобланган болтани ҳовли тўридаги ўтинлар орасига яшириб, ўз жонига қасд қилган.

Самарқанд вилоят суд-тиббиёт экспертизасининг 2020 йил 8 август кунидаги дастлабки маълумотномасида, марҳума Ж.М.нинг ўлими очиқ бош-мия жароҳати, калла гумбаз суякларининг синиши оқибатида келиб чиққанлиги маълум қилинган.

Мазкур ҳолат юзасидан Самарқанд шаҳар прокуратураси томонидан М.М.га нисбатан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, дастлабки тергов ҳаракатлари олиб борилмоқда.