Эҳтиёжманд фуқаро «прописка»сидан қатъи назар, яшаб турган манзилида ёрдам олиши мумкинлиги маълум қилинди

АОКА биносида 10 август, душанба куни Маҳалла ва оилани қўллаб-қувватлаш вазирлиги ахборот хизмати раҳбари Саодат Боймирзаева иштирокида брифинг бўлиб ўтди.

«Мен Самарқанд вилоятида доимий рўйхатда тураман. Ҳозирда Тошкент шаҳрида ижарада яшаб келяпман. Карантин муносабати билан ҳозир ҳеч қаерда ишламаяпман. Мен ҳам Тошкент шаҳридаги Ҳомийлик марказидан озиқ-овқат ёрдами олсам бўладими? Пул маблағлари-чи?», — дея аҳолидан келиб тушган саволга вазирлик расмийси қуйидагича жавоб берди:

«Маҳалла ва оилани қўллаб-қувватлаш вазирлиги ҳузуридаги Ҳомийлик хайрияларини мувофиқлаштириш ва волонтёрлик марказлари фаолиятида бу каби ҳолатлар жуда кўп учрайди.

Мавжуд амалиётга кўра, ҳомийлик ёрдамлари фуқаронинг айни вақтда яшаб турган манзилига етказиб берилади. Яъни сиз маълум бир жойда доимий рўйхатда туришингиз ёки турмаслигингиздан қатъи назар, ёрдамлар ҳозирда яшаб турган уй манзилингизга юборилади», — деди Саодат Боймирзаева.

Вазирлик вакили фуқаролар ҳомийлик маҳсулотларини олиши учун нима қилиши кераклиги борасида ҳам маълумот бериб ўтди.

«Бунинг учун, аввало, яшаб турган ҳудудингиздаги фуқаролар йиғинига мурожаат қилиш тавсия этилади. Шунингдек, мамлакатимиз миқёсида ягона ҳисобланувчи 1197 қисқа рақамлари ҳамда ҳар бир ҳудуддаги Ҳомийлик хайрияларини мувофиқлаштириш ва волонтёрлик марказларининг Call-марказларига телефон орқали мурожаат қиласиз.

Маҳалла ва оилани қўллаб-қувватлаш вазирлигида ҳам аҳолига янада қулайлик яратиш, ҳомийлик маҳсулотларини етказиш, бу борада аҳоли мурожаатларини қабул қилиш мақсадида ишонч телефонлари фаолият юритмоқда. +(99871) 203-01-21 телефон рақамига ҳар куни соат 9:00 дан соат 17:00 га қадар қўнғироқ қилиб, мурожаатларингизни қолдиришингиз мумкин.

Келтириб ўтилган йўналишлар бўйича сизнинг ҳар бир мурожаатингиз қатъий назоратга олинади ҳамда уй манзилингизга зарур хайрия маҳсулотлари етказиб берилади.

Ҳомийлик пул маблағларини аҳолига етказиш ‘Маҳалла’ хайрия жамоат фонди республика бошқаруви, фонднинг ҳудудий бўлинмалари ҳузурида ташкил этилган ‘Саховат ва кўмак’ жамғармаси маблағлари ҳисобидан амалга оширилади», — дейди Саодат Боймирзаева.