АОКА ҳузуридаги штабда Коронавирусга қарши курашиш штаби аъзоси Рустам Икромов иштирокида ўтказилган брифингда айни вақтда даволанишда бўлган мансабдор шахслар ва ҳукумат аъзоларининг ҳолати бўйича маълумот берилди.
Жумладан, аҳолидан келган «Сурхондарё вилояти ҳокими Тўра Боболов, Бухоро вилояти ҳокими Карим Камолов, бош вазир ўринбосари Ўктам Барноев, соғлиқни сақлаш вазири Алишер Шодмонов, Бош давлат санитария инспектори Нурмат Отабеков ва бошқа мансабдорларнинг саломатлиги ва бугунги ҳолати ҳақида маълумот берсангиз», деган саволга мутахассис қуйидагича жавоб берган:
«Албатта, юқоридаги таниқли шахсларимизнинг саломатлиги ҳолати билан қизиққанингиз учун катта раҳмат, айни кунларда уларнинг саломатлигида ташвишли нарса йўқ, даволаш ишлари давом этмоқда».
Эслатиб ўтамиз, аввалроқ Сурхондарё вилояти ҳокими Тўра Боболов, Навоий вилояти ҳокими Қобул Турсунов, Бухоро вилояти ҳокими вазифасини бажарувчи Карим Камолов, Ўзбекистон бош вазири ўринбосари Ўктам Барноев, давлат бош санитария инспектори Нурмат Отабеков коронавирус инфекциясидан, Соғлиқни сақлаш вазири Алишер Шодмонов эса Республика кардиология марказида даволанаётгани хабар берилган. Ҳабибулло Оқилов Шодмонов коронавирусдан даволанаётгани ҳақидаги тахминларни рад этган.
29 июль куни Ўзбекистон молия вазири ўринбосари Ёрқин Турсунов, 31 июль куни эса Қорақалпоғистон Жўқорғи Кенгеси раиси Муса Ерниязов коронавирус инфекцияси асоратлари оқибатида вафот этгани маълум бўлгади.
Изоҳ (0)