Россиялик тиббиёт ходимлари гуруҳи Ўзбекистонга коронавирусга қарши курашда ёрдам бериш учун келади. Бу ҳақда Россия соғлиқни сақлаш вазири Михаил Мурашко коронавирусга қарши кураш бўйича мувофиқлаштирувчи кенгаш президиуми йиғилишида маълум қилди, деб хабар бермоқда «Известия».
«Биз халқаро фаолиятимизни ҳам давом эттирмоқдамиз. Шуни таъкидлаб ўтмоқчиманки, мутахассисларимиз Қозоғистондан ўз вазифаларини бажариб қайтди. Эндиликда Ўзбекистонга жўнатиладиган мутахассислар гуруҳи тайёрланмоқда», – деб айтган Мурашко йиғилишда.
Июль охирида Мурашко Россияда коронавирусга қарши ишлаб чиқилаётган вакцинанинг таркибига Ўзбекистон ҳам кирувчи Шанхай ҳамкорлик ташкилоти давлатларига етказилиши бўйича музокаралар олиб борилаётганини маълум қилган.
Россия соғлиқни сақлаш вазири ўринбосари Олег Гриднев 7 августда Россия коронавирусга қарши вакцинани рўйхатга оладиган дунёдаги биринчи давлат бўлишини маълум қилган. Н.Гамалея маркази томонидан ишлаб чиқилган вакцина 12 августда рўйхатга олиниши режалаштирилган.
Ўзбекистон Соғлиқни сақлаш вазирлигининг 11 август соат 10:00 берган маълумотига кўра, мамлакатда жами 31 545 нафар одамда коронавирус аниқланган. Беморларнинг 22 992 нафари соғайган, 202 нафари эса вафот этган.
Мавзуга доир:
Изоҳ (0)