Нукус шаҳрида 10 августдан бошлаб Қорақалпоғистон Республикаси Транспорт вазирлиги томонидан А.Досназаров, Тўрткўл гузари, Шароф Рашидов кўчалари бўйлаб 45 та йўналишли автобуснинг қатнови қайта тикланди. Бу ҳақда ЎзА хабар берди.
Маълум қилинишича, «Автотранс Чимбой» давлат унитар корхонасига тегишли автобуслар карантин талабларига амал қилган ҳолда Нукус шимолий автовокзали—Нукус шаҳар савдо комплекси, Самонбай—Нукус шаҳар савдо комплекси, Жийдели байсин—Ҳарбий гарнизон, Боз овул—Қум овул каби асосий 9 та йўналишда ҳаракатланади.
Шунингдек, махсус лицензияга эга бўлган йўналишсиз таксиларнинг кун давомида ҳаракатланишига рухсат берилди. Ўрнатилган қатъий тартибга кўра автотранспорт воситаси салонида ҳайдовчи ўриндиғи йўловчилар ўриндиғидан шаффоф пластик ёки махсус плёнка билан тўсилган бўлиши, ҳайдовчи ва йўловчи тиббий ниқобда бўлиши, йўловчилар сони икки нафардан ошмаслиги, автомобиль бошқарувчиси махсус комбинезон ва ҳимоя воситалари билан таъминланган ҳолда ҳаракатланиши зарур.
Аввалроқ Зарафшон шаҳрида такси ва сартарошхоналар фаолиятига рухсат берилгани, Қарши шаҳрига кириш-чиқиш қайта тиклангани ҳақида хабарлар берилганди.
Изоҳ (0)