Корхоналарда иш ҳақи фондининг ўсиши ва энг кам иш ҳақининг (2020 йил I ярим йиллигида ўтган йилнинг мос даврига нисбатан) 18 фоизга ошиши, солиқ тушумлари динамикасига таъсир кўрсатган асосий омил бўлди. Бундан ташқари, давлат улуши бор корхоналар учун ижтимоий солиқ ставкасининг 25 фоиздан 12 фоизга камайтирилиши ҳам ходимлар иш ҳақини оширишга имкон берди. Бу ҳақда Молия вазирлиги хабар бермоқда.
Маълум қилинишича, жисмоний шахслардан олинадиган даромад солиғи бўйича 2020 йилнинг I ярим йиллигидаги тушумлар ўтган йилнинг мос даврига нисбатан 1,1 триллион сўм кўп бўлиб, 7,3 триллион сўмни ташкил этди.
Шу билан бирга, жисмоний шахслардан олинадиган даромад солиғи бўйича 2020 йил II чорагидаги тушумлар I чоракка нисбатан қуйидаги асосий омиллар туфайли камайганлиги кузатилмоқда:
- 2020 йилнинг апрель ойида иқтисодий фаолликнинг пасайиши натижасида хусусий секторда меҳнатга ҳақ тўлаш жамғармасининг камайиши. Бу камайиш карантин бўйича қатъий чекловлар қабул қилинган даврда ходимларга, шу жумладан бюджет ташкилотларида таътил тўловлари берилиши натижасида қисман қопланди;
- 2020 йилда ходимга тўланадиган, солиққа тортилмайдиган моддий ёрдам суммаси, меҳнатга ҳақ тўлаш энг кам миқдорининг 4,22 бараваридан 7,5 бараваригача оширилиши.
Шу билан бирга, пандемия даврида кичик тадбиркорлик субъектлари ва иқтисодиётнинг айрим тармоқлари учун жорий йилнинг май ойидан бошлаб ижтимоий солиқ ставкасини 12 дан 1 фоизгача камайтирилиши нодавлат секторидаги ходимлар сонини апрель ойига нисбатан 16 фоизга, иш ҳақи фондини эса 22 фоизга ошириш имконини бергани таъкидланди.
Мавзуга доир:
Изоҳ (0)