Президент топшириғига мувофиқ Тошкент вилояти Қибрай тумани ер майдонлари хатлови бошланди. Бу ҳақда «Давергеодезкадастр» қўмитаси матбуот хизмати хабар берди.
«Хатловда ҳар бир қарич ернинг ҳолатини ўрганишимиз керак. Хатлов ҳаққоний ва адолатли бўлиши учун Қибрай туманининг бирорта мутахассиси бу жараёнда қатнашмайди. Хатловда дронлар, ёрдамчи хариталар, GPS навигаторлар ва бошқа барча зарур ускуналардан фойдаланиб, бизга ҳақиқий ҳолатни кўрсатиб беринг. Қаерда қандай муаммо борлигини билсаккина, унга ечим топишнинг имкони пайдо бўлади», — деди қўмита раиси Ҳалилилло Тўрахўжаев.
Хатловнинг кунлик натижалари «yergeoportal.uz»га жойлаштириб борилиши мақсад қилинган. Якунда Қибрай тумани ерларидан фойдаланувчилар тўғрисидаги ҳамда ернинг ҳозирги ҳолати тўғрисидаги ахборотлар геопорталда акс этади.
Аввалроқ Шавкат Мирзиёев Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишгани тўғрисида хабар берилганди. Унга кўра, аҳолига қулайлик яратиш мақсадида шаҳардан Тошкент вилоятига 1010 гектар, вилоятдан пойтахтга 10 196 гектар ер майдони ўтказилиши режалаштирилган.
Президент пойтахтнинг Мирзо Улуғбек туманига қарашли, 385 гектар майдонга эга бўлган Улуғбек шаҳарчасини Тошкент вилоятига бериш тўғрисидаги таклифни маъқуллаган. Шаҳарчанинг Қибрай туманининг маъмурий марказига айланиши кутилмоқда. Бироқ Улуғбек шаҳарчаси аҳолиси Тошкент вилояти таркибига ўтишга қарши чиқди.
Изоҳ (0)