Ўзбекистон Президенти Шавкат Мирзиёев Александр Лукашенкони Беларусь президенти сайловида эришган ишончли ғалабаси билан қутлади. Бу ҳақда Президент матбуот хизмати хабар берди.
Шавкат Мирзиёев ўз мактубида сайловчилар иштирокининг юқори даражаси ва овоз бериш натижалари Беларусь халқининг Александр Лукашенкога бўлган улкан ишончини ва бирдамлигини, аҳоли турмуш даражаси ва сифатини ошириш, мамлакатда барқарор иқтисодий ўсишни таъминлаш йўлида амалга оширилаётган самарали ислоҳотлар давом эттирилишини тўлиқ қўллаб-қувватлаётганини яна бир бор намоён этганини қайд этган.
Шавкат Мирзиёев Ўзбекистон ва Беларусь ўртасида олий даражадаги учрашувларда эришилган келишувларни амалга ошириш икки томонлама муносабатларни аниқ мазмун – иқтисодиёт тармоқларида кооперация бўйича муҳим лойиҳалар ва гуманитар алмашинувга оид дастурлар билан бойитишига ишонч билдирган.
Аввалроқ Хитой раиси Си Цзиньпин Беларуснинг амалдаги президенти Александр Лукашенкони сайловлардаги ғалаба билан биринчи бўлиб табриклаган эди.
«Хитой ҳукумати ва халқи, шунингдек, шахсан ўзимнинг номимдан самимий табрикларимни ва энг яхши тилакларимни изҳор этаман. Ишончим комилки, сизнинг бошқарувгиз остида Беларусь давлат қурилиши ишида янги ажойиб муваффақиятларга, албатта, эришади», — дейди Хитой раҳбари.
«Sinxua» агентлиги маълумотларига кўра, Си Цзиньпин Хитой— Беларусь муносабатларига алоҳида эътибор қаратишини ва Лукашенко билан «елкама-елка» туриб ишлашга тайёр эканлигини билдирган.
Бундан ташқари, Қозоғистон президенти Қосим-Жўмарт Тўқаев ҳам Александр Лукашенкога табрик телеграммасини йўллаган. Бу ҳақда Tengrinews хабар берди.
«Мураккаб сиёсий вазиятда ўтказилган сайловлар натижаси халқ сизнинг Беларусь суверенитети ва мустақиллигини мустаҳкамлашга қаратилган йўналишингизни қўллаб-қувватлашини кўрсатмоқда», — дейилади телеграммада.
Meduza’нинг ёзишича, Россия президенти Владимир Путин ҳам Лукашенкони президентлик сайловларидаги ғалаба билан муборакбод этган. «Ўйлайманки, сизнинг давлатчиликка оид фаолиятингиз Россия—Беларусь муносабатларининг ўзаро манфаатли барча соҳаларининг янада ривожланиши учун хизмат қилади», — дейилади Путин табригида.
Эслатиб ўтамиз, Беларусда 9 август куни президент сайлови бўлиб ўтди. Пойтахт Минскда президент сайловидан кейинги норозилик намойиши бошланган. Иштирокчиларини тарқатиб юбориш учун милициянинг махсус бўлинмаси резина ўқлардан фойдаланишга мажбур бўлган. Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган.
Изоҳ (0)