Беларусда 9 август куни президент сайлови бўлиб ўтди. Сайлов участкалари маҳаллий вақт билан 20:00 (Тошкент вақти билан 22:00)да ёпилди. Расмий давлат экзит-поллари маълумотига кўра, амалдаги президент Александр Лукашенко 79,7 фоиз овоз олган, унинг энг асосий рақиби Светлана Тихановская эса 6,8 фоиз овозни қўлга киритган. STV телеканалининг экзит-поли Лукашенкога 71,4 фоиз, Тихановскаяга 10,1 фоиз овоз берди. Хориждаги сайлов участкаларида эса, экзит-полларга кўра, вазият мутлақо тескари — Беларусдан ташқарида Тихановская яққол устунликка эришган. Марказий сайлов комиссияси (МСК) томонидан эълон қилинган сайловнинг дастлабки натижаларида эса Лукашенко 81 фоиз, Тихановская эса 8 фоиз овоз олганини кўрсатмоқда. МСК сайловнинг якуний натижаларини 14 август куни эълон қилишни режалаштирмоқда.
Овоз бериш жараёнида сайловчилар жуда фаол иштирок этди. МСКнинг расмий маълумотларига кўра, соат 18:00 гача сайловчиларнинг 79 фоизи овоз бериб бўлган эди. Сайлов участкалари ёпилиши арафасида овоз бериш ниятидаги сайловчиларнинг катта навбатлари юзага келди, шу сабабли Минскдаги 10 та сайлов участкаси 20:00 дан кейин ҳам ишини тўхтатмади, ваҳоланки аввалроқ МСК раиси Лидия Ермошина барча сайлов участкалари бир вақтда ёпилишини, шу боис кечки маҳал у ерларга бориш тавсия этилмаслигини таъкидлаган эди. Хориждаги сайлов участкаларида, хусусан, Москва, Варшава ва Киевдаги элчихоналарда ҳам ҳамма овоз бера олмади. Ушбу шаҳарларда овоз беришга улгурмаганлар сайлов участкаларининг ишини узайтириш талаби билан элчихоналар олдида норозилик намойишлари уюштирди; Москвада полициянинг махсус кучлари дипломатик миссия биноси олдида тўпланганларни тарқатиб юборди, бироқ ҳеч ким қўлга олингани йўқ.
Беларусда сайлов куни интернет носозликлар билан ишлади. Фойдаланувчилар Telegram ва Viber мессенжерлари, шунингдек, ВПН-сервислардан фойдаланишда муаммоларга дуч келаётганини таъкидлади. «Белтелеком» давлат алоқа оператори фойдаланувчиларида эса умуман ҳар қандай сайтга киришда муаммолар кузатилди. Шунингдек, кун давомида «Наша нива» ва «Kyky.org» каби мустақил агентлик ва нашрларнинг сайтлари ҳам ишламай қолди. Овоз бериш жараёни якунига етиши билан эса мамлакатнинг энг йирик янгиликлар портали — «Tut.by» ва «Белта» давлат ахборот агентлиги сайтлари ҳам ишламай қолди.
https://twitter.com/tutby/status/1292538957440389126
Сайлов участкалари ёпилиши билан Беларуснинг йирик шаҳарларида қўлга олишлар бошланди. Ҳуқуқ-тартибот органлари ходимлари Лукашенко мухолифларининг соат 22:00 га белгиланган тўпланишларига йўл қўймаслик мақсадида энг йирик шаҳарлардаги асосий майдонларга бориш йўлларини ёпиб қўйди. Айрим жойларда кўчага чиққан одамлар милиция билан тўқнашган. Турли ҳисоб-китобларга кўра, Минск марказида 1 мингдан 5 минг нафаргача одам кўчага чиққан, уларни тарқатиб юбориш учун милициянинг махсус кучлари ёруғлик-шовқинли гранаталардан фойдаланган. Могилёв, Брест, Витебск шаҳарларида ҳам юзлаб норозилар кўчага чиққан. Брестда милиция намойишчиларга қарши кўздан ёш оқизувчи газдан фойдалангани ҳақида ахборот бор.
Изоҳ (0)