Беларусь пойтахти Минскда президент сайлови натижаларини кутиб, сайлов участкаларининг олдида тўпланишни бошлаган одамларни қўлга олиш бошланди, дея хабар бермоқда «Tut.by». Сайт маълумотларига кўра, Могилёв шаҳрида камида уч киши қўлга олинган — у ерда «Атриум» савдо маркази олдида бир неча ўн киши тўпланган бўлган.
Бундан ташқари, «Минск — қаҳрамон-шаҳар» ёдгорлиги олдида ҳам одамларни қўлга олиш бошланган — мухолифат вакиллари сайлов участкалари ёпилиши билан дастлаб айнан шу ерда тўпланишни режалаштирган эди. NEXTA Live Telegram-каналининг ёзишича, Брест шаҳрида одамларни қўлга олиб, милиция бўлинмасига олиб бориб, сўнг қўйиб юборишяпти.
Амалдаги давлат раҳбари Александр Лукашенконинг мухолифлари сайловда овоз бериш жараёни якунига етиши билан сайлов участкаларининг олдида тўпланишни, шундан сўнг Беларусь шаҳарлари бўйлаб оммавий норозилик намойишлари ўтказишни режалаштирган эди.
Пойтахт Минскда милиция шаҳарнинг бош кўчаси — Мустақиллик шоҳ кўчасининг пиёдалар учун мўлжалланган қисмини ёпиб қўйган. Шаҳар марказида бир неча метро бекатлари ҳам ёпилган.
Дастлабки расмий маълумотларга кўра, сайловда амалдаги президент Александр Лукашенко 80 фоиз овоз олиб, ғолиб чиққан; Беларусдан ташқаридаги сайлов участкаларида эса Лукашенконинг асосий рақиби — Светлана Тихановская 80 фоиз олгани айтилмоқда.
Изоҳ (0)