Германияда ишлаб чиқарилган коронавирус вакцинаси 2020 йил охирида ёки келгуси йил бошида фойдаланиш учун тасдиқланиши мумкин. Redaktionsnetzwerk Deutschland’нинг ёзишича, бу ҳақда Паул Эрлих номидаги Вакциналар ва биотиббиёт дори восиларини ишлаб чиқиш институти раҳбари Клаус Цихутек маълум қилди. Ушбу институт Германияда тегишли тиббий маҳсулотларни фойдаланишга рухсат бериш ва уни назорат қилиш учун жавобгардир.
Унинг сўзларига кўра, 2020 йил охири ва кейинги йил бошларида вакцинадан фойдаланишга рухсат 3-босқич синов натижалари ижобий бўлсагина берилади. Синовларнинг учинчи босқичда вакцина инфекциядан ҳақиқатан ҳам самарали ҳимоя қилиши ўрганилади.
Ўз навбатида соғлиқни сақлаш бўйича Европа комиссияси аъзоси Стелла Криакидеснинг айтишича, Еврокомиссия ҳам биринчи коронавирус вакцинаси 2020 йил охирида ёки келгуси йилнинг бошида пайдо бўлишини кутмоқда.
«Ҳозирча бу борада прогноз қилиш қалтис бўлса ҳам, коронавирусга қарши биринчи вакцина 2020 йил охирида – келаси йил бошларида пайдо бўлади деб ҳисоблаш учун етарли ижобий асослар бор», — деб таъкидлаган у.
Айни пайтда дунё бўйлаб бир неча вакциналар ҳозирда якуний синов жараёнида. Хусусан, АҚШда Moderna компанияси ишлаб чиқарган вакцина 30 минг кишида якуний синовдан ўтказилмоқда. Қозоғистонда эса 1 август куни COVID-19’га қарши биринчи эмлаш ўтказилган. Россияда COVID-19’га қарши вакцинанинг клиник синовлари якунланган, оммавий эмлаш октябрь ойида бошланиши режалаштирилмоқда. Мамлакатда 2021 йилдан бошлаб ҳар ойда коронавирусга қарши миллионлаб доза вакцина ишлаб чиқарилиши маълум қилинган.
Аввалроқ ЖССТнинг соғлиқни сақлаш соҳасида фавқулодда вазиятлар бўйича дастури директори Майкл Райан тадқиқотчилар коронавирусга қарши вакциналар яратишда салмоқли натижаларга эришгани, бироқ улар 2021 йилдан эртароқ қўлланилмаслигини айтганди, ташкилот раҳбари Тедрос Гебрейесус эса коронавирусга қарши яратилаётган амалда вакциналар омадсизлик билан якун топиши мумкинлигини билдирган.
Изоҳ (0)