Ўзбекистон Инновацион соғлиқни сақлаш миллий палатаси иқтисодиёт фанлари доктори, профессор, «Буюк келажак» кенгаши эксперти Санжар Чингизович Жалоловнинг 4 август куни коронавирус инфекцияси асоратлари оқибатида вафот этганини хабар қилди. У Тошкент шаҳрида оламдан ўтган.
Хабарга кўра Санжар Жалолов 2018 йилда Ўзбекистонга қайтган ва «Буюк келажак» кенгаши экспертлари таркибига кирган.
Санжар Жалолов Торонтода THETA Collaborative’да тиббиёт технологиялари бўйича консултант сифатида ишлагани боис Ўзбекистонда соғлиқни сақлаш соҳасидаги ушбу йўналишни баҳолашни таклиф қилган. Соғлиқни сақлаш технологияларини баҳолаш мамлакатга қайси дори воситалари ҳақиқатда кераклиги ва уларнинг реал нархини чиқариш имконини беради.
«У ўз ғоялари ва хулосаларини расмий тақдимотлари ва оммавий ахборот воситаларидаги мақолаларида акс эттирган. У нима ҳақида гапираётганини биларди ва Ўзбекистон соғлиқни сақлаш тизимининг самарадорлигини таъминлаш энг яхши халқаро тажрибанинг жорий этилишига ишонарди», — дейилади хабарда.
Профессор Санжар Жалолов Тошкент фармацевтика институти ҳамда халқаро Вестминстер университетида маърузачи сифатида дарс берган. Университетда Жалолов ташаббуси билан жамоатчилик соғлиқни сақлаш факультети ташкил қилинаётганди.
Бундан ташқари, иқтисодиёт фанлари доктори Санжар Жалолов менежер сифатида турли халқаро лойиҳаларда иштирок этган ва нафақат соғлиқни сақлаш тизимидаги иқтисодий масалалар қишлоқ хўжалиги ҳамда давлат ва жамият институтларининг ривожланиши юзасидан ҳам таклифлар берган. Санжар Жалолов 58 ёшда бўлган.
Санжар Жалолов «Дарё» ҳисоби бўйича Ўзбекистонда коронавирус асоратлари оқибатида вафот этган 201-қурбон. Соғлиқни сақлаш вазирлиги ҳисобига кўра, коронавирус қурбонлари 192 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 19 июль куни Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов коронавирус асоратларидан вафот этгани хабар қилинган. 31 июль куни Жиноят ишлари бўйича Тошкент вилоят суди судьяси, 53 ёшли Хайриддин Шермуҳамедов, 1 август куни Тойлоқ тумани прокурори Фарҳод Абдухолиқов вафот этгани хабар берилди. Санжар Жалолов ҳам 4 август куни коронавирус асоратлари оқибатида вафот этгани хабар қилинган. Бироқ ушбу тўққизта ҳолат ҳақида ССВ томонидан айни вақтгача ахборот берилмаган.
Сўнгги маълумотларга кўра, Ўзбекистонда аҳволи оғир беморлар сони биринчи марта 1248 нафарни ташкил этмоқда, улардан 274 нафарининг аҳволи ўта оғир.
Изоҳ (0)