Бир муддат аввал болалар учун видеодарс тайёрлаётган аёлнинг видеоси тарқалган эди. Видеолавҳа охирига аёл тасвирга олиш жараёнига халал берган фарзандларини койиб бергани тушиб қолган. Мазкур видеоролик ижтимоий тармоқларда тарқалиб кетгач, аёлнинг ҳолатини тушуниш билан қабул қилганлар қаторида, буни кулгига олиб, турли масхара, пародия лавҳалар олганлар ҳам бўлди.
Куни кеча Мактабгача таълим вазирлиги ушбу ҳолат юзасидан изоҳ бериб, видеодаги аёл Наманган вилояти, Чортоқ туманидаги 7-сонли мактабгача таълим ташкилоти тарбиячиси эканини, тизимда бир неча йилдан бери ишлаши, ўтган давр мобайнида у томонидан ҳеч қандай ножўя ҳаракатлар амалга оширилмагани, иш берувчи томонидан ижобий таърифланишини маълум қилди.
Шунга қарамай, «болалар хархашаси сабаб ҳиссий мувозанатдан чиқиб кетиб, назоратни йўқотгани», «ўз фарзандларини тарбиячи касбий этикасига зид равишда қўпол койиб ташлагани» учун унга интизомий жазо қўлланилган. Шунингдек, боғчалар қайта ишга тушгач, Нурматованинг фаолияти кузатиб борилиши билдирилди (айни вақтда, боғча тарбиячисига ўринсиз жазо тайинланганини таъкидлаётганлар ҳам бор).
«Дарё» мухбири Миролим Исажонов билан суҳбатда Ҳилола Нурматова воқеа қандай бўлганини сўзлаб берди.
«Машғулотлар ўтиш учун 3-4 марта видеоролик оламан, сўнг уларни мактабгача таълим ташкилотимизнинг Telegram’даги гуруҳига ташлаб қўяман. Кичкина қизим беш ёш, катта ўғлим етти ёш — тасвирга олиш вақтида ўғлим ёрдам берарди. 16 июль куни ролик олаётганимда шундай ҳолат бўлиб қолди, кейинроқ ўша воқеа ёзилган видеони адашиб гуруҳга ташлаб юборибман. Орадан 15 дақиқалар ўтиб, ҳамкасбим менга нотўғри видео кетиб қолганини айтди, шундан сўнг уни ўчириб, ўрнига бошқа вариантини гуруҳга ташладим», — дейди у.
Боғча тарбиячисининг айтишича, видео орадан 10 кунлар ўтиб ижтимоий тармоқларда тарқалиб кетган, шундан сўнг у видеони айнан ким тарқатиб юборганини аниқлаш ҳаракатига ҳам тушган.
«Адашиб, шундай ҳолат акс этган видеони гуруҳга чиқариб юборганим эсимдан ҳам чиқиб кетган эди. Ким тарқатиб юборганини аниқлашга ҳаракат қилдим, лекин ‘жиноятга айланиб кетади, сурди-сурди бўлади’ дейишгани учун бошқа бунақа иш қайтарилмайди, деб ҳаракатдан тўхтадим. Эрмак қилиб олинган уч-тўртта видеони кўргач, бу руҳиятимга қаттиқ таъсир қилди, телефонимни ўчириб қўйдим — ҳамма таниш-билишлар телефон қилаверди. Мудирамиз ҳам ‘телефонингизни ўчириб қўйинг’, деб огоҳлантирди», — дейди у.
Кичик ёшдаги болалар гуруҳида ишлайдиган Ҳилола Нурматова бу йил Наманган давлат университетининг махсус сиртқи йўналишини тамомлаган. Айтишича, ишига фидойи, касбини ҳам, болаларни ҳам севади, олийгоҳни ўқиб тугатишдан мақсад эса бирорта болалар боғчасига мудира бўлиш ниятида эди. У бундан кейин ҳам яхши ишлаб, фақат олға қадам босмоқчи эканини таъкидлади.
«Инсонга доимо яхши фикр билан қараш керак — ҳамма ҳам адашади, беайб Парвардигор. Бир марта адашган бўлсам, шунга қоралаб чиқиш шартми? Бирор одам ҳақида фикр билдираркансан, уни ҳар томонлама ўрганиш керак. Кимдир, балки, шундай эрмак қилишдан манфаатдордир... Бундан кейин ҳам яхши ишлаб, ўзимни кўрсатмоқчиман, орқага эмас, фақат олдинга юраман. Ким ёмонлик тиласа, мен уларга яхшилик тилайман», деб қўшимча қилди Ҳилола Нурматова.
Изоҳ (0)