Наманган вилоятининг Норин туманини вилоят маркази билан боғловчи «Нориндарё» кўприги таъмири 2020 йил сентябрь ойида якунига етади. Бу ҳақда таъмирлаш ишларини олиб бораётган «2-кўприкқурилиш» унитар корхонаси бошлиқ ўринбосари Расулжон Норматов маълум қилди, дея хабар беради «Дарё» мухбири Азизбек Абдувалиев.
Норматовга кўра, 25 августга қадар монтаж ишлари тугалланиши кўзда тутилган. Бунга параллел равишда бетон қуйиш жараёни ҳам олиб борилади.
«Нориндарё» кўприги орқали ҳаракатланиш 2020 йил 24 апрель куни тўхтатилган эди.
Бунга 1962 йилда барпо этилган кўприкда кузатилган дарз ва ёриқлар сабаб бўлган. Уларнинг ҳолати йўловчилар ва транспорт учун хавфли кўринишга келиб қолганди. Узунлиги 270 метр бўлган кўприкдаги мукаммал таъмирлаш ишларидан сўнг кўприкнинг эни ҳам 2 метрга кенгайиб, йўловчилар учун алоҳида йўлак барпо этилади.
Ҳозирда 160 мингдан ортиқ аҳолига эга туман фуқаролари вилоят марказига қатнаш учун Учқўрғон ва Балиқчи туманлари орқали айланиб боришига тўғри келмоқда.
Аввалроқ ижтимоий тармоқларда одамлар дарёнинг нариги қирғоғига қайиқларда ўтишга мажбур бўлаётгани акс этган видеолар тарқалганди.
Изоҳ (0)