Ўзбекистонда 9 август куни соат 17:00 гача Соғлиқни сақлаш вазирлиги коронавирусга чалинган 4 нафар бемор вафоти ҳақида хабар берди. Тошкент шаҳри, Тошкент, Навоий ва Қашқадарё вилоятларида бир нафардан эркак оламдан ўтган.
Биринчи ўлим. Тошкент шаҳри Шайхонтоҳур туманида яшаган 84 ёшли Қ.Я. исмли эркак вафот этган.
Иккинчи ўлим. Тошкент вилояти Зангиота туманида яшаган 62 ёшли С.Т. исмли эркак вафот этган.
Учинчи ўлим. Навоий вилояти Навоий шаҳрида яшаган 61 ёшли Б.Р. исмли эркак вафот этган.
Тўртинчи ўлим. Қашқадарё вилояти Қарши шаҳрида яшаган 67 ёшли Қ.К. исмли эркак вафот этган. Қашқадарё вилоятида коронавирус асоратларидан вафот этганлар 8 нафарга етди. Ўлимлар сони бўйича Қашқадарё Тошкент шаҳри ва вилоятидан сўнг 3-ўринга чиқиб олди.
Соғлиқни сақлаш вазирлиги ҳисобига кўра, коронавирус қурбонлари 192 нафарни ташкил этмоқда. «Дарё» ҳисоби бўйича коронавирус асоратларидан вафот этганлар сони 200 нафарга етди.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 19 июль куни Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов коронавирус асоратларидан вафот этгани хабар қилинган. 31 июль куни Жиноят ишлари бўйича Тошкент вилоят суди судьяси, 53 ёшли Хайриддин Шермуҳамедов, 1 август куни Тойлоқ тумани прокурори Фарҳод Абдухолиқов вафот этгани хабар берилди. Бироқ ушбу саккиз ҳолат ҳақида ССВ томонидан айни вақтгача ахборот берилмаган.
Сўнгги маълумотларга кўра, Ўзбекистонда аҳволи оғир беморлар сони биринчи марта 1248 нафарни ташкил этмоқда, улардан 274 нафарининг аҳволи ўта оғир.
ССВ маълумотлари бўйича 9 август соат 17:00 ҳолатига кўра, Ўзбекистонда коронавирус инфекцияси қайд этилганлар сони 30 464 (кун давомида 546 та янги ҳолат аниқланди) нафарни, тузалганлар сони 21 813 (+497) нафарни ташкил этмоқда. Коронавирус инфекциясидан соғайиш кўрсаткичи 71 фоизни ташкил этмоқда.
«Ҳозирда мамлакатимизда 8 459 нафар беморга шифокорларимиз томонидан белгиланган стандартлар бўйича даво чоралари кўрилмоқда», — дейилади ССВ ахборотида.
Изоҳ (0)