Коронавирусга чалинган абитуриентлар 2020 йилги тест синовларига қўйилмайди. Бу ҳақда Давлат тест маркази бошқарма бошлиғи Диёрбек Қўчқоров айтиб ўтган. Асоссиз сабабларга кўра тест синовларига умуман келмаган абитуриентлар учун алоҳида умумий қоидалар назарда тутилмаган. Улар келгуси йили имтиҳонларда яна ўзини синаб кўриши мумкин.
Абитуриент тест синовларига келган вақтида иситмаси юқори бўлса, шифокорлар томонидан тегишли равишда текширув ташкил этилади. Агар унда коронавирус инфекцияси аниқланмаса, тест синовлари буткул тугагач, 4 кундан сўнг ташкил этиладиган имтиҳонда қатнашиш имконияти берилади. Турли асосли сабаблар туфайли тест синовларида қатнаша олмаган абитуриентлар ҳам тест синовлари тугагач, 4 кундан кейин қайта имтиҳон топшира олади. Коронавирус аниқланган абитуриентлар эса бу йилги тест синовларига қўйилмайди. Ушбу инфекция билан касалланган абитуриентлар имтиҳонда қатнашиши учун коронавирусдан соғайганлиги ҳақидаги маълумотномани тақдим этиши лозим бўлади.
Давлат тест маркази бош бошқарма бошлиғи Барно Ражабовнинг қўшимча қилишича, коронавирусга чалингани туфайли тест имтиҳонларида иштирок эта олмаган абитуриентларнинг имтиҳон учун тўлаган пулларини қайтариш чоралари кўрилади. Давлат қабул комиссияси баённомасига ушбу масала бўйича таклиф киритилган.
Ўзбекистонда ОТМларга кириш имтиҳонларини 25 июлдан 20 августгача ўтказиш режалаштирилаётганди. Бироқ мамлакатда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинди ва кейинчалик карантин 15 августга қадар узайтирилди. 22 июлда АОКАда ўтган брифингда Давлат тест маркази бош бошқарма бошлиғи Барно Ражабов имтиҳон чекловлар 1 сентябргача давом этса, сентябрь ойида ўтказилиши мумкинлигини айтганди.
Изоҳ (0)