Олий ва ўрта махсус таълим вазирлиги бошқарма бошлиғи Абдували Холиқов тест билан бир вақтда ижодий имтиҳон олинадиган йўналишларда бу йил ижодий имтиҳонлар бекор қилиниши мумкинлигини билдирди.
Бу ҳақда АОКА залида Вазирлар Маҳкамаси ҳузуридаги Давлат тест маркази мутасаддилари иштирокидаги матбуот анжуманида айтиб ўтилган.
«Хабарингиз бор, ижодий имтиҳонлар 2 хил шаклдаги таълим йўналишлари бўйича ўтказилади. Биринчи таълим йўналишида тест билан бир вақтда ижодий имтиҳон ўтказиладиган ва фақат касбий-ижодий имтиҳон ўтказиладиган таълим йўналишлари мавжуд. Тест ва ижодий имтиҳонлар бирга ўтказиладиган йўналишлар, масалан, журналистика таълим йўналиши каби 13 та йўналишларда ОТМ ректорлари ва тегишли идораларнинг таклифларига асосан давлат комиссиясига киритилган таклифда абитуриентни икки марта овора қилмаслик учун ижодий имтиҳон ўрнига олдинги йили фанлар блокида бўлган фанлардан фақат тест олиш таклифи киритилган. Масалан, журналистика таълим йўналишида она тили ва хорижий тил блоки бўлган бўлса, бу йили фақатгина ана шу 2 фанни қолдирган ҳолда ижодий имтиҳонни чиқариш таклифи киритилган», — деди Абдували Холиқов.
Айни тартиб бу йил истисно тариқасида 1 йил учун жорий этилади, олдинги йилларда тестда мавжуд бўлмаган бегона фанлар кириб қолмаслиги таъкидланди. Фақат касбий-ижодий имтиҳон ўтказиладиган йўналишларда имтиҳонларни ўтказиш тартиби ўзгармайди.
Изоҳ (0)