Ўзбекистонда 2020/2021-ўқув йили 1-босқич талабалари учун ҳам онлайн тарзда бошланиши мумкин

Олий ва ўрта махсус таълим вазири ўринбосари Ўктам Саломов АОКА залида бўлиб ўтган матбуот анжуманида 2020/2021-ўқув йили 1-босқич талабалари учун ҳам онлайн тарзда бошланиши мумкинлигини маълум қилди.

«Юқори курс, яъни бакалавр босқичининг 2, 3, 4-босқич талабаларига ҳозирча сентябрь ойидан бошлаб масофавий таълим бошланади. Тест синовлари тугагач, октябрь ойида 1-курсларни ҳам қабул қилиб олганимиздан кейин пандемия сал юмшаса, балки, анъанавий тизимга яна қайтармиз. Агар эпидемиологик шарт-шароит тўғри келмайдиган бўлса, 1-курсларни ҳам масофавий таълим шаклига ўтказишни бошлаймиз», — деди Салимов.

Қайд этилишича, 1-курсга қабул қилинган талабалар учун дарс машғулотлари 1 октябрдан бошланади.

Матбуот анжуманида ўқув йилини қай тартибда бошлаш бўйича ҳар битта механизм шу вақтгача 3 марта олий таълим муассасалари ректорлари, ўқув ишлари бўйича проректорлар, ўқув бўлими бошлиқлари билан муҳокама қилингани айтиб ўтилди.

Эслатиб ўтамиз, аввалроқ Республика Олий таълим кенгаши раиси Ўктам Умурзоқов ҳам сентябрь ойидан бошлаб юқори босқич (иккинчи босқичдан бошлаб) талабалари учун ўқиш онлайн тарзда бошланишини айтган эди. Аввал Президент Шавкат Мирзиёев раҳбарлигида 6 август куни 2020 йилда олий таълим муассасаларига қабулни ташкил қилиш ва 2020/2021-ўқув йилига тайёргарлик кўриш масалалари юзасидан бўлиб ўтган йиғилишда Ўзбекистонда ОТМларга кириш имтиҳонлари икки сменада стадионларда ўтказилиши маълум қилинганди.