Бухоро вилояти ҳокими Карим Камоловнинг вафот этгани тўғрисидаги хабар рад этилди. Бу ҳақда вилоят ҳокими ўринбосари Фарҳод Умаров иштирокидаги брифингда маълум қилинди, дея хабар берди «Дарё» мухбири.
Ижтимоий тармоқларда тарқалган хабарларга ойдинлик киритиш мақсадида вилоятда 7 август куни журналист ва блогерлар учун матбуот брифинги ташкил этилди.
«Бундай шов-шувлар ўринсиз. Ҳозирда вилоят раҳбари Карим Камоловнинг аҳволи яхши. Хавотирга ўрин йўқ. У яқин кунларда тўлиқ тузалиб, ўз фаолиятини давом эттиради», — деди ҳокими ўринбосари Фарҳод Умаров.
«Дарё» мухбирининг ёзишича, 2020 йил 4 августдан бошлаб вилоят аҳолиси ўртасида «Бухоро ҳокими Тошкентдаги шифохонада вафот этибди. Айни пайтда собиқ вилоят раҳбари Ўктам Барноевнинг ҳам аҳволи ўта оғир экан. Агар унинг ҳам ҳаётини сақлаб қолиш имкони бўлмаса, икки мутасадди жасади битта самолёт орқали Бухорога келтирилар экан» деган шов-шувли хабарлар тарқалган.
Вилоят ҳокимлиги масъуллари эса бу мазмундаги хабарлар 4 августдан бошлаб тарқалган бўлишига қарамасдан, орадан уч кун ўтгач бунга муносабат билдирган. Ўтган фурсат давомидаги сукунат одамларни ваҳима ва хавотирга солишга улгурган.
Эслатиб ўтамиз, Бухоро вилояти ҳокими вазифасини бажарувчи Карим Камоловда коронавирус тасдиқлангани сабабли Тошкентдаги шифохонада даволанишни бошлаган эди. Бироз ўтиб, ҳокимнинг пойтахтда даволаниши «Нега Карим Камолов вилоятда эмас, пойтахт шифохонасида даволаняпти, бу ҳолат вилоятдаги шифокор-мутахассисларга ишончсизлик эмасми?», деган саволни ўртага ташлади.
Бухоро ҳокимлиги ахборот хизмати эса амалдаги қонунчиликка кўра вилоят ҳокимлари ҳукумат қошидаги тиббиёт бош бошқармаси рўйхатида туриб, зарур ҳолатларда тиббий диагностика қилиш, даволаш, умуман олганда, уларнинг саломатлигини муҳофаза қилиш мазкур бошқарма зиммасида эканини эслатди.
«Шунга мувофиқ ушбу тиббиёт бош бошқармасининг талабига кўра, Карим Камолов 29 июль куни даволаш муолажаларини давом эттириш учун Тошкент шаҳридаги клиникага кўчириб ўтказилди. Вилоят ҳокими ўтган 3 кун давомида малакали тиббиёт мутахассислари томонидан Соғлиқни сақлаш вазирлиги тавсияларига мувофиқ ишлаб чиқилган стандартлар асосида даволаш курсларини ўтамоқда. Ҳозирда Карим Камоловнинг аҳволи яхши. У яқин кунларда тўлиқ тузалиб, ўз фаолиятини давом эттиради», – дея хабар қилган эди ҳокимликнинг матбуот хизмати.
Карим Камоловдан ташқари Сурхондарё вилояти ҳокими Тўра Боболов ҳам коронавирусга чалингани тасдиқланган (Сурхондарё ҳокими ҳам Тошкентда даволанмоқда). 31 июлда Қорақалпоғистон Жўқорғи Кенгеси раиси Муса Ерниязов вафот этган, 30 июлда унинг аҳволи оғир деб баҳоланган ва сунъий нафас олиш аппаратига улангани айтилганди. Президент Шавкат Мирзиёев 31 июль куни Ерниязовнинг вафоти муносабати билан ҳамдардлик йўллаган.
Навоий вилояти ҳокимлиги 31 июль куни вилоят раҳбари Қобул Турсунов сўнгги тўрт кундан бери Тошкентда даволанишда экани ҳақида хабар берган, бироқ унинг айнан қайси касалликдан даволанаётганига аниқлик киритмаганди. Кейинчалик Турсуновнинг коронавирусга чалингани ва Тошкент шаҳрида даволанаётгани маълум қилинган.
Шунингдек, Ўзбекистон бош вазири ўринбосари Ўктам Барноев, давлат бош санитария инспектори Нурмат Отабеков ҳам коронавирус инфекциясидан даволанаётгани ҳақида хабар берилган. 29 июль куни Ўзбекистон молия вазири ўринбосари Ёрқин Турсунов коронавирус инфекцияси асоратлари оқибатида вафот этгани маълум бўлган эди.
Изоҳ (0)