Денов тумани ҳокимлиги 2020 йилнинг 6 август куни «Kun.uz» сайтида эълон қилинган «Деновда эҳтиёжмандларга пул тарқатилиб, қайтариб олинди. Тушунмовчилик қаердан келиб чиққан?» сарлавҳали материал юзасидан расмий муносабат билдирилди.
Ҳокимликнинг маълум қилишича, 2020 йилнинг 30 июль куни Денов туманидаги эҳтиёжманд ва ижтимоий ҳимояга муҳтож 2 124 та хонадонга 1 миллиард 725 миллион 604 минг сўм миқдорида бир марталик моддий ёрдам пули тарқатилган. Ушбу хонадонларда 9 678 нафар фуқаро истиқомат қилади. Уларнинг барчаси маҳаллаларда шакллантирилган эҳтиёжманд, ижтимоий ҳимояга ва ёрдамга муҳтож оилаларнинг шаффоф рўйхати – «темир дафтар»га киритилган хонадонлар ҳисобланади.
«Ҳақиқатан ҳам 3-сектор ҳудудидаги ‘Зарафшон’ маҳалласида ‘темир дафтар’га киритилмаган, бироқ маҳалладаги эҳтиёжманд оилалар рўйхатида бўлган 9 та хонадонга ҳам 500 минг сўмдан ёрдам пули тарқатилган. Маҳалла масъуллари ушбу маблағлар ‘темир дафтар’га киритилган фуқароларга тарқатилиши кераклигини билишганидан сўнг, 9 та хонадонга тарқатилган моддий ёрдам пули қайтариб олиниб, эҳтиёжманд хонадонларга етказиб берилган.
Ўрганиш натижасига кўра, ушбу 9 та хонадон ижтимоий ҳимояга муҳтож эканлиги инобатга олиниб, туман ‘Саховат ва кўмак’ умумхалқ ҳаракати доирасидаги маблағлар ҳисобидан ҳар бир оилага 500 минг сўмдан бир марталик моддий ёрдам пули берилди», – дейилади ҳокимлик хабарида.
Аввалроқ Сергелида муҳтожларга пул тарқатилиши масаласи кўтарилгани ва масъуллар аҳоли билан учрашгани ҳақида хабар берилган эди.
Мавзуга доир:
Изоҳ (0)