Термиз шаҳридаги «Сурхон» спорт ҳамда «Алпомиш» кураш мажмуалари биноларида яқин кунларда 592 ўринли ташхислаш, саралаш, тақсимот пунктлари ўз фаолиятини бошлайди. Бу ҳақда Сурхондарё вилояти ҳокимлигининг ахборот хизмати хабар қилди.
Пандемия даврида беморларга бирламчи тиббий хизмат кўрсатишга мўлжалланган махсус биноларга тез тиббий ёрдам бўлимига ҳарорати кўтарилиб, мурожаат қилган беморлар келтирилади. Бу ерда уларга ташхис қўйилади ва аҳволининг ўта оғир, оғир ва енгиллигига қараб саралаш ишлари ташкил этилади.
Беморларнинг клиник белгиларидан келиб чиқиб, улар шифохонага ёки уйи шароитида даволаниш учун йўналтирилади.
Вақтинчалик пунктларга тиббий кўрик учун зарур замонавий тиббиёт анжомлари билан таъминланиб, малакали тиббиёт ходимлари жалб этилади. Беморлар учун кислородли ўринлар тайёрланади, дейилади ҳокимлик хабарида.
Сурхондарё вилояти ҳокими Тўра Боболовда коронавирусга чалингани тасдиқланган (Сурхондарё ҳокими Тошкентда даволанмоқда).
31 июлда Қорақалпоғистон Жўқорғи Кенгеси раиси Муса Ерниязов вафот этган, 30 июлда унинг аҳволи оғир деб баҳоланган ва сунъий нафас олдириш аппаратига улангани айтилганди. Президент Шавкат Мирзиёев 31 июль куни Ерниёзовнинг вафоти муносабати билан ҳамдардлик йўллаган.
Навоий вилояти ҳокимлиги 31 июль куни вилоят раҳбари Қобул Турсунов сўнгги тўрт кундан бери Тошкентда даволанишда экани ҳақида хабар берган, бироқ унинг айнан қайси касалликдан даволанаётганига аниқлик киритмаганди. Кейинчалик Турсуновнинг коронавирусга чалингани ва Тошкент шаҳрида даволанаётгани маълум қилинган.
Шунингдек, Ўзбекистон бош вазири ўринбосари Ўктам Барноев, давлат бош санитария инспектори Нурмат Отабековда ҳам коронавирус инфекциясидан даволанаётгани ҳақида хабар берилган эди. 29 июль куни Ўзбекистон молия вазири ўринбосари Ёрқин Турсунов коронавирус инфекцияси асоратлари оқибатида вафот этгани маълум бўлган
Изоҳ (0)