Prezident Shavkat Mirziyoyev O‘zbekiston Qahramoni, Qoraqalpog‘iston Jo‘qorg‘i Kengesi raisi, Oliy Majlis Senati raisi o‘rinbosari Musa Yerniyazovning vafoti munosabati bilan hamdardlik bildirdi. Bu haqda Prezident matbuot xizmati xabar bergan.

Musa Yerniyazov.

Foto: “Daryo”

O‘zbekiston xalqi og‘ir judolikka uchradi.

Atoqli davlat va jamoat arbobi, Qoraqalpog‘iston Jo‘qorg‘i Kengesi raisi – O‘zbekiston Respublikasi Senati Raisining o‘rinbosari, O‘zbekiston Qahramoni Musa Tajetdinovich Yerniyazov shu yil 31-iyul kuni 73 yoshida og‘ir kasallikdan so‘ng vafot etdi.

Musa Yerniyazov 1947-yil 20-dekabr kuni Qoraqalpog‘iston Respublikasi Kegeyli tumanida tug‘ildi. O‘rta maktabni tugatib, 1971-yilda Toshkent qishloq xo‘jaligini irrigatsiyalash va mexanizatsiyalash muhandislari institutini, 1986-yili Toshkent Oliy partiya maktabini tamomladi.

Mehnat faoliyatini qurilish muhandisi lavozimidan boshlab, keyinchalik Qoraqalpog‘iston Respublikasining Vazirlar Kengashida katta referent, boshqarma boshlig‘i, ishlar boshqaruvchisi bo‘lib ishladi.

1983—1989-yillarda Qoraqalpog‘iston Respublikasi Uy-joy kommunal xo‘jaligi vaziri, Vazirlar Kengashi raisining o‘rinbosari – Davlat mulkini boshqarish va tadbirkorlikni qo‘llab-quvvatlash davlat qo‘mitasi raisi, Chimboy tumani hokimi lavozimlarida samarali faoliyat ko‘rsatdi.

2002-yildan hozirgi vaqtda qadar Qoraqalpog‘iston Respublikasi Jo‘qorg‘i Kengesi Raisi – O‘zbekiston Respublikasi Oliy Majlisi Senati Raisining o‘rinbosari lavozimida ishladi.

Musa Tajetdinovich Yerniyazov qariyb 50 yillik mehnat faoliyati davomida o‘zining ulkan rahbarlik salohiyati, boy bilim va tajribasi, ma’naviy fazilatlari bilan, Vatanimizga beqiyos muhabbati va sadoqati bilan haqli ravishda xalqimizning qalbidan chuqur joy olgan ulug‘ inson edi.

Uning bevosita rahbarligida Qoraqalpog‘iston Respublikasini iqtisodiy-ijtimoiy rivojlantirish, Orol bo‘yidagi ekologik vaziyatni yaxshilash, aholining turmush darajasini oshirish bo‘yicha ulkan bunyodkorlik va obodonchilik ishlari amalga oshirildi.

Qoraqalpoq diyorida keyingi yillarda yuz bergan barcha ulkan o‘zgarishlar Musa Tajetdinovich Yerniyazovning nomi va amaliy faoliyati bilan chambarchas bog‘liqdir.

U qoraqalpoq elining haqiqiy yetakchisi sifatida doimo xalqning dard-u tashvishlari bilan yashadi. Ayniqsa, keksa avlod vakillari, mehribon opa-singillarimiz, aziz yoshlarimizning turmush va mehnat sharoitlarini yaxshilash, ularning munosib kelajagini ta’minlash yo‘lida chinakam jonbozlik ko‘rsatib sidqidildan xizmat qildi.

Musa Tajetdinovich Yerniyazov O‘zbekiston Respublikasi Oliy Majlisi Senati Raisining o‘rinbosari sifatida mustaqilligimizni mustahkamlash, mamlakatimizda parlamentarizm tizimini rivojlantirish ishiga ulkan hissa qo‘shdi, iqtisodiy-ijtimoiy taraqqiyotimiz uchun zarur bo‘lgan muhim qonunlarni ishlab chiqish va amalga oshirish yo‘lida ayniqsa faollik ko‘rsatdi.

Musa Tajetdinovich Yerniyazovning davlatimiz va xalqimiz oldidagi ulkan xizmatlari munosib taqdirlandi. U “Mehnat shuhrati” va “Fidokorona xizmatlari uchun” ordenlari, “O‘zbekiston Respublikasida xizmat ko‘rsatgan quruvchi” va “O‘zbekiston Qahramoni” yuksak unvonlari bilan mukofotlangan edi.

Xalqimizning ulug‘ farzandi, atoqli davlat va jamoat arbobi, samimiy va fidoyi inson Musa Tajetdinovich Yerniyazovning xotirasi qalblarimizda doimo saqlanib qoladi.

Sh.Mirziyoyev, T.Norboyeva, N.Ismoilov, A.Aripov, Q.Sariyev

Musa Yerniyazov koronavirusga chalingani haqidagi xabarlar iyul oyi boshida paydo bo‘lgan, ammo o‘shanda Qoraqalpog‘iston rahbariyati bu xabarlarni qat’iy rad etgandi.

O‘zbekiston Sog‘liqni saqlash vazirligi (SSV) 18-iyul kuni Qoraqalpog‘iston Respublikasi Jo‘qorg‘i Kengesi raisi Musa Yerniyazov koronavirusga chalingani haqida xabar bergan. SSV Yerniyazovning ahvolini barqaror, deb baholagandi. Musa Yerniyazovda koronavirus infeksiyasi tasdiqlanganidan beri u Respublika ixtisoslashtirilgan xirurgiya ilmiy-amaliy tibbiyot markazining Qoraqalpog‘iston filiali klinikasida davolangan.

30-iyuldagi AOKAda o‘tkazilgan matbuot anjumanida Sog‘liqni saqlash vazirligi huzuridagi Koronavirusga qarshi kurash bo‘yicha shtab a’zosi Anvar Alimov Musa Yerniyazovning ahvoli og‘irligi va u sun’iy nafas olish apparatiga ulanganini ma’lum qilgandi.