O‘zbekiston Davlat bojxona qo‘mitasi koronavirus pandemiyasi davrida o‘pkani sun’iy nafas oldirish apparatlari hamda kislorod konsentratorlariga bo‘lgan talabning oshgani sabab qurilmalarning importi soddalashtirilgani va mazkur tovarlar “yashil” yo‘laklar orqali o‘tkazilayotgani to‘g‘risida ma’lumot berdi.
Ta’kidlanishicha, bu turdagi mahsulotlarni tadbirkorlar tomonidan respublikaga hech qanday to‘siqlarsiz olib kirilishiga alohida e’tibor qaratilmoqda.
Xususan, Prezidentning 2020-yil 3-apreldagi “Koronavirus pandemiyasi davrida aholi, iqtisodiyot tarmoqlari va tadbirkorlik subyektlarini qo‘llab-quvvatlashga doir qo‘shimcha chora-tadbirlar to‘g‘risida”gi farmoni bilan tasdiqlangan ro‘yxatga muvofiq ozon, kislorod va aerozol terapiyasi uchun sun’iy nafas oldirish yoki boshqa terapevtik nafas oldirish apparatlarini O‘zbekiston hududiga olib kirishda 2020-yil 31-dekabrga qadar bojxona boji va aksiz solig‘idan ozod qilingan.
Bundan tashqari, Vazirlar Mahkamasining “Koronavirus pandemiyasi davrida dori vositalari, tibbiy buyumlar va tibbiy texnikalar muomalasini tartibga solishga doir chora-tadbirlar to‘g‘risida”gi 2020-yil 22-iyuldagi qaroriga muvofiq, 2020-yil 1-oktabrga qadar bo‘lgan muddatda kislorod konsentratorlar import qilinganda davlat ro‘yxatidan o‘tkazilmasdan va majburiy sertifikatlashtirilmasdan bojxona rasmiylashtiruvini amalga oshirish va realizatsiya qilish belgilangan.
Mazkur imtiyozlardan samarali foydalangan holda tashqi iqtisodiy faoliyat ishtirokchilari tomonidan so‘nggi 1 hafta davomida respublikaga qiymati 4,3 million AQSh dollariga teng 394 dona o‘pkani sun’iy nafas oldirish uskunalari hamda qiymati salkam 2,9 million dollarga teng 5899 dona kislorod konsentratorlari keltirilgan bo‘lib, mazkur tibbiy jihozlar keltirilgan kunning o‘zidayoq soddalashtirilgan tartibda bojxona rasmiylashtiruvidan o‘tkazilgan.
Mazkur tovarlar bojxona organlari faoliyatiga joriy qilingan “Xavfni boshqarish tizimi” orqali asosan “yashil” yo‘laklarda rasmiylashtirilgan bo‘lib, bojxona rasmiylashtiruviga o‘rtacha 1—1,5 soatgacha vaqt sarflangan.
“Turli tushunmovchiliklarni oldini olish maqsadida tadbirkorlar e’tiboriga shuni yetkazish lozimki, O‘zbekiston Prezidentining 2019-yil 10-apreldagi ‘2019—2021-yillarda respublikaning farmatsevtika tarmog‘ini yanada jadal rivojlantirish chora-tadbirlari to‘g‘risida’gi farmoni talablariga muvofiq, 2019-yil 1-iyuldan boshlab import dori vositalari (dori substansiyalari bundan mustasno) va tibbiyot buyumlarini ‘erkin muomalaga chiqarish (import)’ bojxona rejimiga rasmiylashtirishda bojxona qiymatining 1,2 foizi miqdorida bojxona rasmiylashtiruvi uchun yig‘im undirilishi va ushbu yig‘im Farmatsevtika tarmog‘ini qo‘llab-quvvatlash va rivojlantirish jamg‘armasini shakllantirish manbaasi sifatida belgilangan”, — deyiladi xabarda.
Bundan tashqari, O‘zbekiston Prezidentining “Sog‘liqni saqlash sohasida xususiy sektorni yanada rivojlantirish chora-tadbirlari to‘g‘risida” 2017-yil 1-apreldagi qaroriga muvofiq, belgilangan tartibda shakllantiriladigan ro‘yxat bo‘yicha yuridik shaxslar tomonidan olib kelinadigan yangi tibbiyot asbob-uskunalari, butlovchi buyumlar va ularning ehtiyot qismlari hamda sarflash materiallari 2022-yil 1-yanvarga qadar bojxona to‘lovlaridan, shu jumladan, qo‘shilgan qiymat solig‘idan ozod etilgan.
Hozirda tadbirkorlar mazkur imtiyozlardan foydalanish uchun Iqtisodiy taraqqiyot va kambag‘allikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” davlat unitar korxonasining info@expertcenter.uz elektron pochta manziliga tegishli hujjatlarni yuborib, qisqa fursatlarda Markazning ijobiy xulosasini olishlari mumkin.
Shuningdek, taqdim etiladigan hujjatlar va tegishli xulosani tezkorlik bilan olish bo‘yicha qo‘shimcha savollar yuzasidan markazning 71-207-02-65 (64) telefon raqamlariga hamda Davlat bojxona qo‘mitasining 1108 qisqa raqamli ishonch telefoniga murojaat qilishlari mumkin.
Bu turdagi tibbiy uskunalarning asosiy qismi respublikaga havo transporti orqali olib kelinayotgani sababli, tadbirkorlar o‘zlarini qiziqtirgan savollar yuzasidan “Toshkent-Aero” ixtisoslashtirilgan bojxona kompleksining (78) 120-86-30 telefon raqamiga kunning istalgan paytida qo‘ng‘iroq qilib, javob olishlari uchun barcha imkoniyatlar yaratilgan.
Bugungi kunda bojxona idoralarida tovarlarni respublika hududiga olib kirilgunga qadar dastlabki deklaratsiya asosida rasmiylashtirish imkoniyatlari ham yaratilgan bo‘lib, tadbirkorlar ushbu imkoniyatlardan onlayn ravishda foydalanishlari mumkin.
“Davlat bojxona qo‘mitasi kislorod konsentratorlari importi jarayoniga doir xolis va haqqoniy xabarlarni e’lon qilishda ommaviy axborot vositalari, keng jamoatchilik vakillari bilan o‘zaro hamkorlikka doimo tayyor ekanini ma’lum qiladi”, — deyiladi xabarda.
Eslatib o‘tamiz, 20-iyul kuni Shavkat Mirziyoyev O‘zbekistonda koronavirus infeksiyasiga qarshi kurash borasida olib borilayotgan ishlarning chuqur tanqidiy tahliliga bag‘ishlangan videoselektor yig‘ilishida kislorod konsentratorlarini O‘zbekistonga olib kelish uchun maxsus samolyot ajratish haqida ko‘rsatma bergandi.
Izoh (0)