Ўзбекистонда Корея ва Европага ишга юборишни ваъда қилиб, фуқароларнинг 5,6 миллиард сўм пулини ўзлаштирган International Job Organization хусусий бандлик агентлиги раҳбари қамоққа олинди. Бу ҳақда ИИВ Тергов департаменти хабар берди.
Аниқланишича, 1993 йил Қирғизистонда туғилган, фуқаролиги бўлмаган шахс Ш.А. Тошкент шаҳар, Юнусобод тумани, Аҳмад Дониш кўчаси, 2-мавзеда жойлашган фаолият турига кўра Ўзбекистондан ташқарида иш изловчи фуқароларни хорижий давлатда ишга жойлаштириш, бўш иш ўринлари ҳақида маълумотлар бериш ҳисобланган International Job Organization хусусий бандлик агентлиги учун 2019 йилнинг 19 апрель куни Бандлик ва меҳнат муносабатлари вазирлигидан лицензия олиб, жамиятга раҳбарлик қилиб келган.
Жамият ташкил топган кундан бугунги кунга қадар фирибгарлик йўли билан ўзгаларнинг мулкини қўлга киритишни мақсад қилиб, республиканинг барча вилоятларида ваколатхона очган. Турли ОАВ орқали жамият ҳақида эълонлар бериб, бош офис ва ваколатхонага ишга жойлашиш бўйича мурожаат қилиб келган фуқароларни Жанубий Корея ва Европа давлатларига ишга юборишини ваъда қилган.
Уларга Ташқи меҳнат миграцияси агентлигидан олган лицензиясини, Польшада фаолият кўрсатиб келаётган APEX Sp.z.o.o вa WIN SOLUTION Sp.z.o.o корхоналари билан тузилган Ўзбекистон фуқароларини ишга жойлаштириш тўғрисидаги меморандумни кўрсатиш орқали фуқаролар ишончига кирган.
Таклиф этилган давлатдаги ишдан келиб чиққан ҳолда дастлабки тергов давомида аниқланган 132 нафар фуқародан 45 миллион сўмгача бўлган миқдордаги пулларни агентликнинг банк ҳисоб рақамига кирим қилиш йўли билан қўлга киритган. Улардан ҳеч бирини хорижий давлатга ишга юбормасдан, пулларни шахсий эҳтиёжлари ва жамиятнинг фаолияти учун мақсадсиз сарфлаб, давомли жиноий ҳаракатлари билан 5,6 миллиард сўмни ўзлаштирган.
Мазкур ҳолат юзасидан Бош прокуратура ҳузуридаги Иқтисодий жиноятларга қарши курашиш департаменти Сурхондарё вилоят бошқармаси томонидан International Job Organization хусусий бандлик агентлиги директори Ш.А. ва бошқаларга нисбатан Жиноят кодексининг 168-моддаси 4-қисми «а» банди билан жиноят иши қўзғатилган.
10 июнь куни Ш.А. жиноят ишида Жиноят кодексининг 168-моддаси 4-қисми «а» бандида кўрсатилган жиноятни содир этганликда гумон қилинувчи тариқасида иштирок этишга жалб қилинган. 26 июнда жиноят иши ИИВ ҳузуридаги Тергов департаменти иш юритувига олинган ва МЧЖнинг бош офисида тинтув тергов ҳаракати ўтказилган. Тинтув давомида бир қатор буюмлар ашёвий далил сифатида расмийлаштириб олинган.
Жиноят ишини тергов қилиш жараёнида Ш.А. Жиноят кодексининг 168-моддаси 4-қисми «а» бандида кўрсатилган жиноят (Жуда кўп миқдорда фирибгарлик)ни содир этганликда айбланувчи тариқасида иштирок этишга жалб қилиниб, унга нисбатан қамоққа олиш тарзидаги эҳтиёт чораси қўлланилган.
Бугунги кунга қадар МЧЖ томонидан бирорта ҳам фуқаро Ўзбекистондан ташқарида ишга жойлаштирилмаган.
ИИВ ҳузуридаги Тергов департаменти томонидан барча вилоят ИИБ ҳузуридаги тергов бошқармаларига тергов топшириқлари юборилган бўлиб, ушбу топшириққа асосан фуқаролар сўроқ қилиб бўлинганидан сўнг етказилган зарарнинг аниқ миқдори маълум бўлади (етказилган зарарнинг жами миқдори ҳозирги мавжуд зарардан ошиши кутилмоқда).
Таъкидланишича, ҳозирги кунда дастлабки тергов ҳаракатлари давом этмоқда, тергов ҳаракатлари ва жиноят иши натижаси юзасидан қўшимча равишда ахборот бериб борилиши таъминланади.
Эслатиб ўтамиз, Ўзбекистонда бир қатор хусусий бандлик агентликлари мансабдорлари устидан жиноят ишлари очилгач, ҳукумат томонидан мамлакатдаги барча хусусий бандлик агентликларини тугатиш бўйича Президентга таклиф киритилиши маълум қилинганди.
Изоҳ (0)