To‘ldirish: Telegram’dagi kanallarda Bahronovning koronavirus infeksiyasi asoratlari oqibatida vafot etgani haqida xabarlar tarqalgan edi. “Gazeta.uz”ning Buxoro viloyati hokimligi matbuot xizmatiga tayanib xabar berishicha, Bahronovga haqiqatan ham koronavirus infeksiyasi tashxisi qo‘yilgan. Ushbu o‘lim holati yuzasidan O‘zbekiston Sog‘liqni saqlash vazirligi tomonidan axborot berilmagan.

Buxoro xalqaro aeroport direktori, sobiq senator Tohir Bahronov 61 yoshida vafot etdi. Bu haqda viloyat hokimligi matbuot xizmati xabar berdi. Rasmiy xabarda o‘lim sababi keltirilmagan.

Foto: Buxoro viloyati hokimligi

Tohir Bahronov 1959-yil 21-aprelda Buxoro shahrida tavallud topgan. U 1986-yilda Buxoro davlat pedagogika institutini, 1996-yilda Sankt-Peterburg fuqaro aviatsiyasi akademiyasini (sirtdan) tugatgan. Mehnat faoliyatini 1976-yilda Buxoro suv xo‘jaligi boshqarmasi kinomexanigi yordamchisi sifatida boshlab, Buxoro “XATP-11” avtokorxonasi haydovchisi (1977—1978), Buxoro aviaotryadining tashish bo‘limi dispetcheri (1980—1982), Buxoro shahar avia agentligi boshlig‘i (1982—1985), Buxoro aeroporti yo‘lovchilar tashishni tashkil qilish xizmati boshlig‘i, direktor o‘rinbosari (1985—1997) lavozimlarida ishlagan.

U 1997-yildan buyon “Buxoro xalqaro aeroporti” DUK direktori lavozimida ishlab kelayotgandi. Shuningdek, Oliy Majlis deputati (1999—2004), Xalq deputatlari Buxoro viloyati kengashi deputati (2014—2019), Oliy Majlis Senati a’zosi (2014—2019) bo‘lgan.

Buxoro viloyati hokimligi Tohir Bahronovning vafoti munosabati bilan uning oila a’zolari, yaqinlariga hamdardlik bildirgan.

Avvalroq Turizmni rivojlantirish davlat qo‘mitasining birinchi raisi Anvar Sharapov, sobiq “O‘zbekturizm” kompaniyasi raisining birinchi o‘rinbosari lavozimida faoliyat yuritgan Ne’mat Abdullayev vafot etgani to‘g‘risida xabar berilgandi.