АҚШ, Буюк Британия, Япония ва Европа Иттифоқи давлатлари коронавирусга қарши потенциал вакциналарнинг 1,3 миллиарддан ортиқ дозасини етказиб бериш бўйича келишиб олди. Бу ҳақда Лондондаги Airfinity таҳлил компаниясига таяниб, Bloomberg хабар берди.
АҚШ ва Буюк Британия Sanofi ва GlaxoSmithKline Plc компанияларининг вакцинасини етказиб бериш бўйича, Япония эса Pfizer билан шу турдаги шартномани имзолаган. Bloomberg’нинг ёзишича, Европа Иттифоқи давлатлари ҳам вакцина ҳали фойда бериши исботланмаган бўлса-да, харидларни амалга ошириш борасида «шижоат кўрсатмоқда».
Таҳлилчиларнинг маълумотларига кўра, вакциналарни етказиб беришни кўпайтириш имконияти ҳамда ҳали ёпилмаган битимларни ҳисобга олган ҳолда, ушбу мамлакатлар ўзларини таъминлаган дозалар миқдори 1,5 миллиарддан ортиши мумкин. Шу сабабли улар бошқа давлатлар вакцина учун «сўнгги навбатда» қолиб кетишидан хавотирда.
Халқаро ташкилотлар ва бир қатор давлатлар вакциналарни барча харид қилиши мумкинлигини ваъда қилмоқда, бироқ «дозалар дунёдаги 7,8 миллиард одамга етмаслиги мумкин». Ривожланмаган давлатлар 2009 йилда чўчқа гриппи пандемиясидаги ҳолат такрорланишидан хавотирда. Ўшанда кўплаб бой давлатлар вакциналар етказиб берилишда монополга айланган эди.
«Оптимистик томондан баҳолаганда ҳам вакцина бутун дунё учун етмайди», — дейди Airfinity ижрочи директори Расмус Бех Хансен. Бундан ташқари, аксарият ҳолларда вакцина киши бошига бир эмас, икки дозада қилинишини ҳам ҳисобга олиш керак.
Аввалроқ Россияда COVID-19’га қарши вакцинанинг клиник синовлари якунлангани ҳақида хабар берилганди. Унга кўра, оммавий эмлаш октябрь ойида бошланиши режалаштирилган.
Шунингдек, дунё бўйлаб бир неча вакциналар ҳозирда якуний синов жараёнида. Хусусан, АҚШда Moderna компанияси ишлаб чиқарган вакцина 30 минг кишида якуний синовдан ўтказилмоқда. Қозоғистонда эса 1 август куни COVID-19’га қарши биринчи эмлаш ўтказилган.
Изоҳ (0)