АҚШ қишлоқ хўжалиги вазирлиги мамлакатда Хитойдан келган ва ичида сирли уруғлар бўлган почта жўнатмалари ҳаёт учун хавфли эмаслигини билдирди. Шунингдек, вазирлик одамларга иложи борича жўнатмаларни очмаслик, уларга ҳеч нима қилмасликни тавсия этган. Бу ҳақда Business Insider хабар қилди.
Аввал АҚШ, Канада ва Буюк Британияда юзлаб одамларга сирли почта жўнатмалари етказиб берилган. Хитойдан ҳеч нарса буюртма қилмаган кишиларга ушбу давлатдан жўнатма юборилганди. Қутининг устига ичкарида тақинчоқлар борлиги ёзилган, аммо очиб кўрилганидан посилка ичида уруғлар борлиги маълум бўлган.
Дастлаб АҚШдаги бир нечта штатлардаги бошқарув тизими вакиллари ушбу уруғлар ерга экилса, зарарли ўсимликлар униб чиқиши мумкинлигини тахмин қилди. Нью-Йорк қишлоқ хўжалиги бошқармаси фуқаролардан ушбу уруғларга умуман тегмаслик, болалар ва уй ҳайвонларини улардан узоқда тутишни сўраган.
Бироқ Қишлоқ хўжалиги вазирлиги америкаликларга ялпиз, розмарин ва лаванда уруғлари юборилган деган хулосага келди. Идора расмий вакили Осама Ал-Лиссининг сўзларига кўра, уруғлар орасида инсон ҳаётига хавф соладиган ўсимликларники эмаслигини айтган.
Ал-Лиссининг фикрича, гап хавфли ҳужум ҳақида эмас, балки Хитой интернет-дўконларининг айримларидаги фирибгарлик ҳолатлари ҳақида кетмоқда. Улар ўз рейтингини кўтариш учун ёлланма харидордан буюртма қабул қилади ва маҳсулотни Хитойдан бошқа хорижий мамлакат ҳудудига етказиб беришни буюртма қилади. Сотувчи эса ушбу манзилга умуман кераксиз нарсани юборади, жўнатманинг қаерга кетаётгани эса почта хизмати томонидан кузатилади. Жўнатма сўнгги манзилга ерказилганида, ёлланма харидор (трек-код орқали жўнатмани онлайн кузатади) маҳсулотни олгани ва хизматдан фойдалангани фойда келтиргани ҳақида ижобий фикр ёзади.
Хитой почта хизмати бу борада АҚШ ҳукумати билан ҳамкорлик қилишга тайёр эканини билдирган ва жўнатувчи компаниялар ҳақида маълумотга эга бўлиш учун посилкаларни ортга қайтаришни сўраган.
Аввал АҚШ президенти Дональд Трамп мамлакатда 2020 йил ноябрда бўлиб ўтиши режалаштирилган президентлик сайловларини бошқа муддатга кўчиришни таклиф қилгани ва Twitter’даги саҳифасида почта орқали берилган овозлар энг ноаниқ ва тарихдаги энг ҳийлакор бўлади, деб ҳисоблаши ҳақида пост қолдиргани хабар қилинган. Кейинчалик Трамп АҚШда президентлик сайловлари санасини кўчириш борасидаги позициясини ўзгартирган ва Оқ уйдаги чиқиши вақтида ноябрь ойида ўтказиладиган президентлик сайловларини кўчиришни истамаслигини маълум қилган.
Изоҳ (0)