Россияда совет муҳандислари томонидан йиғилган амфибия «Запорожец» сотувга қўйилди

Россиянинг Краснодар ўлкаси яқинида Афипск посёлкасида СССР вақтида йиғилган ноодатий қўлбола амфибия сотувга қўйилди, деб хабар беради CARakoom.

Ноодатий машина «Запарожец» енгил автомобили ҳамда «казанка»ни (моторли қайиқ) чатиштириш натижасида пайдо бўлган.

Лойиҳанинг асосини оддий йўлларда ҳам ҳаракатни таъминлай оладиган бир қатор деталларга эга моторли қайиқ ташкил этади. Қайиқ корпуси икки жуфт ғилдираклар устига ўрнатилган (орқа қисми юк машиналариники каби иккиталик шинага эга). Ғилдираклар сувда ҳаракатланиш вақтида йиғиладиган махсус штангаларга қотирилади. Орқа ғилдиракларнинг узатмаси ҳар бирига уланган индивидуал занжирлар орқали амалга оширилади.

«Запорожец» двигатели орқа қисмига ўрнатилган. У машинанинг сув ва қуруқликда ҳаракатланишига жавоб беради. Иккинчи ҳолатда, иккита парракли винт ҳам ишга тушади. Винтлар ўрасида моторни ишга туширувчи стартёр жойлашган.

Амфибия ичига баланд борт устидан сакраб ўтиб кириш мумкин. Бу ерда «Запорожец»нинг бошқарув деталлари жойлашган: рул чамбараги, қурилмалар панели, учта тепки, узатмалар қутисини бошқарувчи ричаг ва қўл тормози.

Амфибия барча зарурий ёруғлик техникалари билан жиҳозланган, орқа фаралари «Москвич»ники. Том қисми вазифасини эса кичкина ойначаларга эга юмшоқ мато бажаради.

Эълонда «Орзу» номини олган мазкур амфибия қуруқликда соатига 70 километр, сувда эса 50 км/соат тезликда ҳаракатлана олиши ёзилган. Сотувчи ноодатий катер учун 999 999 рубль (14 минг доллар) сўрамоқда.