Трамп TikTok’ни АҚШ ҳудудида тақиқламоқчи эканлигини маълум қилди

АҚШ президенти Дональд Трамп TikTok ижтимоий тармоғини мамлакат ҳудудида тақиқлаш ниятида эканлигини маълум қилди, деб хабар беради Reuters.

Трампнинг сўзларига кўра, у бу борадаги тегишли қарорни қабул қилиши мумкин — масалан, ижроия буйруғини чиқариш ёки фавқулодда иқтисодий ваколатлардан фойдаланиш.

Шунингдек, Трамп бирор-бир Америка компаниясининг TikTok’ни сотиб олишини қўллаб-қувватламаслигини таъкидлаган.

Таъкидланишича, ҳозирда Трампнинг тақиқ ўрнатишга ваколати етиш ёки етмаслиги, у қанчалик тез амалга оширилиши ҳамда бунга қарши қандай чора кўрилиши мумкинлиги номаълум.

Аввалроқ Microsoft Хитойнинг ByteDance компаниясига тегишли TikTok сервисини сотиб олиш бўйича музокаралар ўтказаётгани тўғрисида хабар берилганди. Reuters’нинг маълум қилишича, ByteDance TikTok’нинг Америка бўлинмасидаги барча улушини Microsoft’га сотишга рози бўлган.

Эслатиб ўтамиз, июль охирларида инвесторлар TikTok сервисини 50 миллиард долларга баҳолаган эди.