Коронавирус пандемияси Европа иқтисодиётини 10-20 йил ортга сургани маълум қилинди

Европа Иттифоқининг ялпи ички маҳсулоти (ЯИМ) 2020 йилнинг иккинчи чорагида ўтган чоракка нисбатан 11,9 фоизга ва ўтган йилнинг шу даврига нисбатан 14,4 фоизга пасайди. Бу ҳақда Европа статистика агентлиги – Eurostat’га таяниб, «РБК» маълум қилди.

Евро пул бирлиги амал қиладиган ҳудудларда ЯИМ 12,1-15 фоизга пасайган. Бу Европа Иттифоқи ва евро ҳудуди ялпи ички маҳсулотининг 1995 йилдан бери кузатилган энг катта пасайиш экани маълум қилинган.

Евро ҳудуди иқтисодиёти 2019 йил охиридан бошлаб пасая бошлаган. 2019 йилнинг тўртинчи чорагида ялпи ички маҳсулоти нол ўсишни кўрсатди ва 2020 йилнинг биринчи чорагида у 3,6 фоизга пасайди.

Европа иқтисодиёти коронавирус пандемияси туфайли Америкадан кўра кўпроқ зарар кўрди. Иккинчи чоракда АҚШ ялпи ички маҳсулоти ўтган чоракка нисбатан 9,5 фоизга пасайди, деб хабар беради АҚШ Савдо вазирлиги.

Йилнинг биринчи чорагида евро ҳудудининг ялпи ички маҳсулоти 2,9 триллион евродан ошди, Европа Иттифоқида бу кўрсаткич 3,4 триллион еврога тенг бўлди.

Европа комиссиясининг июль ойидаги прогнозига кўра, бутун 2020 йил давомида Европа Иттифоқининг ялпи ички маҳсулоти 8,3 фоизга тушди. Прогноз карантин чекловлари аста-секин олиб ташланади ва пандемиянинг иккинчи тўлқини содир бўлмайди, деган тахминга асосланган.

Евро ҳудудидаги энг йирик иқтисодиётга эга давлат – Германиянинг ЯИМи иккинчи чоракда олдингисига нисбатан 10,1 фоизга пасайган. Бу билан Германия ялпи ички маҳсулоти 2011 йил даражасига тушиб кетган.

Франция ялпи ички маҳсулоти ўтган чоракка нисбатан 13,8 фоизга камайган. Бу Иккинчи жаҳон урушидан бери ЯИМнинг рекорд даражадаги пасайиши ҳисобланади.

Испания ялпи ички маҳсулоти энг кўп зарар кўргани айтилмоқда. Мамлакат ЯИМи ўтган чоракка нисбатан 18,5 фоизга тушган. Бу билан Испания иқтисодиёти 2002 йил даражасига қайтиб қолган.

Италия иқтисодиёти бу чоракда 12,4 фоизга қисқарган. Италия учун бу сўнгги ўн йилликдаги тўртинчи пасайиш. Financial Times маълумотларига кўра, мамлакат ЯИМнинг сўнгги бор бундай даражаси 1990 йилларнинг бошларида бўлган.

Шу ойда Европа раҳбарлари 750 миллиард евро миқдоридаги фондни ташкил қилишга келишиб олдилар ва бу фондлар оғир зарарли иқтисодиётларни тиклашни молиялаштиради.