Қозоғистонда коронавирус инфекциясига қарши биринчи эмлаш Қозоғистон миллий аграр университетидаги Халқаро вакцинация марказида ўтказилди, деб хабар беради Хабар 24’га таяниб «Fergana.ru».
Ушбу марказ вакили Кайсар Табинов COVAX-19 вакцинасини қабул қилган биринчи қозоғистонлик бўлди. Таъкидланишича, препарат Австралияда ишлаб чиқилган ва ҳозирда клиник синовларнинг биринчи босқичида.
Австралиялик вирусологлар 2020 йилнинг апрель ойида COVID-19 касаллигини келтириб чиқарадиган SARS CoV-2 коронавирусига қарши вакцинани синовдан ўтказишни бошлади. Ўша пайтда, Австралия Миллий илмий CSIRO’да вакцинага номзодларни синовдан ўтказишнинг бошланиши COVID-19’га қарши курашда муҳим босқич» эканлигини айтганди.
Қозоғистоннинг ўз COVID-19 вакцинаси Миллий биотехнология маркази ва Биологик хавфсизлик илмий-тадқиқот институти томонидан ишлаб чиқилмоқда. Таълим ва фан вазири Асхат Аймагамбетовнинг сўзларига кўра, ушбу препаратни клиник синовлари сентябрь ойида бошланиши режалаштирилган. Амалдорнинг сўзларига кўра, клиникадан олдинги синовлар 15 майдан бошлаб муваффақиятли ўтказилмоқда.
Жонс Ҳопкинс университети маълумотларига кўра, дунёда 17,6 миллиондан ортиқ одам коронавирус билан касалланган, 679 мингдан кўпроқ одам вафот этган. 1 август ҳолатига кўра, Қозоғистонда коронавирус билан боғлиқ 90 367 ҳолати қайд этилган, 60 825 киши тўлиқ даволанган, 793 киши вафот этган.
Аввалроқ Россияда COVID-19’га қарши вакцинанинг клиник синовлари якунлангани ҳақида хабар берилганди. Унга кўра, оммавий эмлаш октябрь ойида бошланиши режалаштирилган.
Шунингдек, дунё бўйлаб бир неча вакциналар ҳозирда якуний синов жараёнида. Хусусан, АҚШда Moderna компанияси ишлаб чиқарган вакцина 30 минг кишида якуний синовдан ўтказилмоқда. Шунингдек, Хитойнинг Sinopharm Group компанияси ўз вакцинасини Ўзбекистон ва БАА давлатидаги 15 минг кишида якуний синовдан ўтказмоқчи.
Мавзуга доир:
Изоҳ (0)