Маҳалла ва оилани қўллаб-қувватлаш вазирлиги ахборот хизмати раҳбари Саодат Боймирзаева АОКАда бўлиб ўтган брифингда 2020 йил 30 июлдаги «Коронавирус пандемияси даврида ижтимоий ҳимоя ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида»ги Президент фармони бўйича пул маблағлари тарқатилгани, бироқ эҳтиёжманд бўлишига қарамай, мурожаатчилардан бирининг оиласига пул берилмагани юзасидан саволга жавоб қайтарди.
«Ҳурматли юртдошлар, ушбу фармон бўйича назарда тутилган пул маблағлари ҳали тарқатилгани йўқ. Бу борада тегишли рўйхатлар қайта кўриб чиқилмоқда, аҳолининг эҳтиёжмандлик даражаси аниқланмоқда. Сиз назарда тутган пул маблағлари Коронавирус пандемияси даврида аҳолининг ижтимоий ҳимояга муҳтож қатламларини янада қўллаб-қувватлаш мақсадида қабул қилинган Вазирлар Маҳкамасининг 2020 йил 29 июлдаги 346-Ф-сонли фармойиши асосида тарқатилди.
Саволингиздан келиб чиқсак, сиз ўзингиз яшайдиган маҳаллага мурожаат қилишингиз керак. Мурожаатингиз кўриб чиқилиб, сизга ёрдам кўрсатилади ёки асосли тарзда хулоса берилади», – деган Боймирзаева.
Брифингда маҳалла раиси бир марта сайланса, ўн йиллаб ишлаб юравериши ҳақидаги саволга ҳам жавоб берилган.
«Маҳалла ва оилани қўллаб-қувватлаш вазирлиги ва унинг ҳудудий бўлинмалари маҳалла раисларини тўғридан-тўғри бўшатиш ваколатига эга эмас.
Зеро, Фуқароларнинг ўзини ўзи бошқариш органлари тўғрисидаги қонуннинг 4-моддасида белгилаб қўйилганидек, фуқароларнинг ўзини ўзи бошқариш органлари фаолиятига давлат органларининг ва улар мансабдор шахсларининг аралашувига йўл қўйилмайди.
Маҳалла ва оилани қўллаб-қувватлаш вазирлиги маҳаллаларни қўллаб-қувватлайди, уларнинг самарали фаолият олиб боришига кўмаклашади. Ўз фаолиятига номуносиб деб топилган маҳалла раислари ҳақида фуқаролар йиғини кенгашига тавсия бериши мумкин.
Маҳалла раиси сайланади, уни халқ сайлайди. Халқ томонидан ишонч билдирилиб сайланган раис ўз ишига масъулият билан ёндашмаётган экан, аҳолининг ўзи уларнинг фаолиятига баҳо бериши керак. Маҳалла фаолиятига бефарқ бўлмаган фуқаро ўз маҳалласи раиси фаолияти бўйича бемалол фуқаролар йиғини билан маслаҳатлашиб қонуний баҳо бериши мумкин.
Ушбу қонуннинг 24-моддасига кўра, Фуқаролар йиғини раисининг (оқсоқолининг) ваколатлари қуйидаги ҳолларда муддатидан илгари тугатилади:
- у ўз ваколатларини зиммасидан соқит қилганда;
- фуқаролар йиғини раиси (оқсоқоли) умумқабул қилинган ахлоқ, одоб нормаларини қўпол равишда бузувчи, раис (оқсоқол) мақомини бадном қилувчи ва фуқаролар йиғини обрўсига путур етказувчи хатти-ҳаракатлар ва ножўя ишлар содир этган, шунингдек ўз вазифаларини мунтазам равишда узрли сабабларсиз бажармаган тақдирда фуқаролар йиғини (фуқаролар вакилларининг йиғилиши) томонидан қарор қабул қилинганда;
- у белгиланган тартибда муомалага лаёқатсиз деб топилганда;
- унга нисбатан суднинг айблов ҳукми қонуний кучга кирганда;
- у суднинг қонуний кучга кирган ҳал қилув қарори асосида бедарак йўқолган деб топилган ёхуд вафот этган деб эълон қилинганда;
- у Ўзбекистон Республикаси фуқаролигини йўқотганда;
- у соғлиғи ҳолати ёки бошқа узрли сабабларга кўра уч ой давомида ўз вазифаларини бажара олмай қолганда;
- у вафот этганда.
2020 йилда 283 нафар фуқаролар йиғинлари раиси ишдан бўшаган», – дея саволга жавоб берган Маҳалла ва оилани қўллаб-қувватлаш вазирлиги ахборот хизмати раҳбари.
Ўзбекистон Президенти Шавкат Мирзиёев 30 июль куни «Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида»ги фармонни имзолаган. Фармонга кўра, пандемия шароитида моддий ёрдам ва кўмакка муҳтож оилаларнинг рўйхатларига («темир дафтар»га) киритилган ва аъзолари 1,7 миллион нафардан ортиқ бўлган 400 мингдан кўпроқ оилага республика бюджетидан бир марталик моддий ёрдам пули берилиши кўзда тутилган.
Шунингдек, 30 июлда Ўзбекистон ҳукуматнинг тегишли фармойишига асосан «Саховат ва кўмак» жамғармаси орқали ижтимоий ҳимояга муҳтож оилаларга моддий ёрдам тарқатилган.
1 август куни тушдан кейин Тошкент шаҳар Сергели туманида аҳоли вакиллари туман ҳокимлиги биноси атрофида тўпланди. Тўпланганлар Ўзбекистонда эҳтиёжманд оилалар учун 30 июндан бошлаб берилаётган нақд пул шаклидаги маблағларнинг масъуллар томонидан тўғри тақсимланмагани давоси, шунингдек, маблағлар тақсимланишидаги айрим тушунмовчиликлар сабаб норозилик билдирган. Тошкентнинг Сергели тумани «Ҳумо» маҳалласида нақд пул шаклидаги бир марталик ёрдам пули масаласида маҳалла аҳолиси ва маъмурияти ўртасида юзага келган зиддиятли ҳолат акс этган видеоёзув тарқалган. Ушбу можаро сабаб Тошкент шаҳар ҳокими Жаҳонгир Ортиқхўжаев маҳаллага бориб аҳоли билан учрашган ва у пул олиши керак бўлганлар рўйхатини аҳолининг ўзи тузиб беришини таклиф қилган.
Бундай ҳолат Тошкентдан ташқари Хоразмда ҳам кузатилган. Тегишли видеода аҳолига 1 миллион сўм ўрнига 700 минг сўм тарқатилётгани, агар шунга рози бўлишмаса кейинги ёрдам пулини бермаслик билан таҳдид қилингани айтилган. Маҳалла вазирлиги бу каби воқеаларга жавобан ҳеч қандай хавотирга ўрин йўқлигини билдирган.
Изоҳ (0)