Mahalla va oilani qo‘llab-quvvatlash vazirligi axborot xizmati rahbari Saodat Boymirzayeva AOKAda bo‘lib o‘tgan brifingda 2020-yil 30-iyuldagi “Koronavirus pandemiyasi davrida ijtimoiy himoya va yordamga muhtoj aholi qatlamlarini moddiy qo‘llab-quvvatlashga doir qo‘shimcha chora-tadbirlar to‘g‘risida”gi Prezident farmoni bo‘yicha pul mablag‘lari tarqatilgani, biroq ehtiyojmand bo‘lishiga qaramay, murojaatchilardan birining oilasiga pul berilmagani yuzasidan savolga javob qaytardi.
“Hurmatli yurtdoshlar, ushbu farmon bo‘yicha nazarda tutilgan pul mablag‘lari hali tarqatilgani yo‘q. Bu borada tegishli ro‘yxatlar qayta ko‘rib chiqilmoqda, aholining ehtiyojmandlik darajasi aniqlanmoqda. Siz nazarda tutgan pul mablag‘lari Koronavirus pandemiyasi davrida aholining ijtimoiy himoyaga muhtoj qatlamlarini yanada qo‘llab-quvvatlash maqsadida qabul qilingan Vazirlar Mahkamasining 2020-yil 29-iyuldagi 346-F-sonli farmoyishi asosida tarqatildi.
Savolingizdan kelib chiqsak, siz o‘zingiz yashaydigan mahallaga murojaat qilishingiz kerak. Murojaatingiz ko‘rib chiqilib, sizga yordam ko‘rsatiladi yoki asosli tarzda xulosa beriladi”, – degan Boymirzayeva.
Brifingda mahalla raisi bir marta saylansa, o‘n yillab ishlab yuraverishi haqidagi savolga ham javob berilgan.
“Mahalla va oilani qo‘llab-quvvatlash vazirligi va uning hududiy bo‘linmalari mahalla raislarini to‘g‘ridan to‘g‘ri bo‘shatish vakolatiga ega emas.
Zero, Fuqarolarning o‘zini o‘zi boshqarish organlari to‘g‘risidagi qonunning 4-moddasida belgilab qo‘yilganidek, fuqarolarning o‘zini o‘zi boshqarish organlari faoliyatiga davlat organlarining va ular mansabdor shaxslarining aralashuviga yo‘l qo‘yilmaydi.
Mahalla va oilani qo‘llab-quvvatlash vazirligi mahallalarni qo‘llab-quvvatlaydi, ularning samarali faoliyat olib borishiga ko‘maklashadi. O‘z faoliyatiga nomunosib deb topilgan mahalla raislari haqida fuqarolar yig‘ini kengashiga tavsiya berishi mumkin.
Mahalla raisi saylanadi, uni xalq saylaydi. Xalq tomonidan ishonch bildirilib saylangan rais o‘z ishiga mas’uliyat bilan yondashmayotgan ekan, aholining o‘zi ularning faoliyatiga baho berishi kerak. Mahalla faoliyatiga befarq bo‘lmagan fuqaro o‘z mahallasi raisi faoliyati bo‘yicha bemalol fuqarolar yig‘ini bilan maslahatlashib qonuniy baho berishi mumkin.
Ushbu qonunning 24-moddasiga ko‘ra, Fuqarolar yig‘ini raisining (oqsoqolining) vakolatlari quyidagi hollarda muddatidan ilgari tugatiladi:
- u o‘z vakolatlarini zimmasidan soqit qilganda;
- fuqarolar yig‘ini raisi (oqsoqoli) umumqabul qilingan axloq, odob normalarini qo‘pol ravishda buzuvchi, rais (oqsoqol) maqomini badnom qiluvchi va fuqarolar yig‘ini obro‘siga putur yetkazuvchi xatti-harakatlar va nojo‘ya ishlar sodir etgan, shuningdek o‘z vazifalarini muntazam ravishda uzrli sabablarsiz bajarmagan taqdirda fuqarolar yig‘ini (fuqarolar vakillarining yig‘ilishi) tomonidan qaror qabul qilinganda;
- u belgilangan tartibda muomalaga layoqatsiz deb topilganda;
- unga nisbatan sudning ayblov hukmi qonuniy kuchga kirganda;
- u sudning qonuniy kuchga kirgan hal qiluv qarori asosida bedarak yo‘qolgan deb topilgan yoxud vafot etgan deb e’lon qilinganda;
- u O‘zbekiston Respublikasi fuqaroligini yo‘qotganda;
- u sog‘lig‘i holati yoki boshqa uzrli sabablarga ko‘ra uch oy davomida o‘z vazifalarini bajara olmay qolganda;
- u vafot etganda.
2020-yilda 283 nafar fuqarolar yig‘inlari raisi ishdan bo‘shagan”, – deya savolga javob bergan Mahalla va oilani qo‘llab-quvvatlash vazirligi axborot xizmati rahbari.
O‘zbekiston Prezidenti Shavkat Mirziyoyev 30-iyul kuni “Koronavirus pandemiyasi davrida ijtimoiy himoyaga va yordamga muhtoj aholi qatlamlarini moddiy qo‘llab-quvvatlashga doir qo‘shimcha chora-tadbirlar to‘g‘risida”gi farmonni imzolagan. Farmonga ko‘ra, pandemiya sharoitida moddiy yordam va ko‘makka muhtoj oilalarning ro‘yxatlariga (“temir daftar”ga) kiritilgan va a’zolari 1,7 million nafardan ortiq bo‘lgan 400 mingdan ko‘proq oilaga respublika budjetidan bir martalik moddiy yordam puli berilishi ko‘zda tutilgan.
Shuningdek, 30-iyulda O‘zbekiston hukumatning tegishli farmoyishiga asosan “Saxovat va ko‘mak” jamg‘armasi orqali ijtimoiy himoyaga muhtoj oilalarga moddiy yordam tarqatilgan.
1-avgust kuni tushdan keyin Toshkent shahar Sergeli tumanida aholi vakillari tuman hokimligi binosi atrofida to‘plandi. To‘planganlar O‘zbekistonda ehtiyojmand oilalar uchun 30-iyundan boshlab berilayotgan naqd pul shaklidagi mablag‘larning mas’ullar tomonidan to‘g‘ri taqsimlanmagani davosi, shuningdek, mablag‘lar taqsimlanishidagi ayrim tushunmovchiliklar sabab norozilik bildirgan. Toshkentning Sergeli tumani “Humo” mahallasida naqd pul shaklidagi bir martalik yordam puli masalasida mahalla aholisi va ma’muriyati o‘rtasida yuzaga kelgan ziddiyatli holat aks etgan videoyozuv tarqalgan. Ushbu mojaro sabab Toshkent shahar hokimi Jahongir Ortiqxo‘jayev mahallaga borib aholi bilan uchrashgan va u pul olishi kerak bo‘lganlar ro‘yxatini aholining o‘zi tuzib berishini taklif qilgan.
Bunday holat Toshkentdan tashqari Xorazmda ham kuzatilgan. Tegishli videoda aholiga 1 million so‘m o‘rniga 700 ming so‘m tarqatilyotgani, agar shunga rozi bo‘lishmasa keyingi yordam pulini bermaslik bilan tahdid qilingani aytilgan. Mahalla vazirligi bu kabi voqealarga javoban hech qanday xavotirga o‘rin yo‘qligini bildirgan.
Izoh (0)