Канадалик актёр Райан Рейнольдс бир неча кун олдин Мара Сориано исмли аёлнинг ичида пахмоқ айиқчаси бўлган рюкзаки ўғирлаб кетилгани тўғрисида ёзган эди. Актёр ўзининг Twitter’даги саҳифаси орқали маълум қилишича, айиқча ўз эгасига қайтарилган.
«Ажойиб янгилик. Айиқчани қидирган барчага раҳмат. Ўйинчоқни топиб олиб, уни сақлаб қўйганларга ҳам раҳмат», — деб ёзади Рейнольдс.
Аввалроқ «Дэдпул» юлдузи ушбу пахмоқ айиқчани ўз эгасига қайтарганга 5 минг доллар ваъда қилган эди. USA Today маълумотларига кўра, ўғирланган буюмни эгасига қайтарганлар ўзларининг исмини ошкор қилишни истамаган.
Ўғирланган рюкзак ичида ҳужжатлар ва iPad, шунингдек, аёлнинг энг қадрли нарсаси — пахмоқ айиқчаси ҳам бўлган. Маълум бўлишича, ўйинчоқ ичида диктофон бўлиб, унга Сорианонинг июнь ойида саратондан вафот этган онасининг сўзлари ёзиб олинган. Бундан таъсирланган Рейнольдс ўйинчоқни қидиришга киришган эди.
Изоҳ (0)