Жароҳатидан тикланаётган Марко Ройс яна сафдан чиқди

«Боруссия Дортмунд» ярим ҳимоячиси Марко Ройс номаълум муддатга сафдан чиқди. Бу ҳақда клуб матбуот хизмати хабар бермоқда.

Қайд этиш жоиз, германиялик футболчи жароҳатидан энди-энди тиклаётганди ва маълум даражада ўсишга ҳам эришганди, бироқ у машғулотларда яна мушакларини шикастлаб олган.

«Афсуски, унда шикастланиш бор. У жамоа билан машғулот ўтказа олмайди.

Унинг қачон сафга қайтишини олдиндан айтиш мушкул. Муаммо унинг боғловчи мушакларида», — дейди клуб спорт директори Михаэль Цорк.

Ройс жароҳати сабаб 2020 йил февраль ойидан бери майдонга тушгани йўқ. Июнь ойининг бошларида эса у жамоа билан машғулотларни бошлаганди.

31 ёшли футболчи Германия Бундеслигасининг 2019/20 йилги мавсумида 19 та ўйинида майдонга тушиб, 11 та гол ва 5 та голли узатмага муаллифлик қилган.