Тошкент вилояти Қибрай туманида 29 июль куни Чирчиқ—Бўзсув сув-энергетик трактидаги «Қодирия ГЭСлар каскади» унитар корхонаси таркибидаги Қодирия ГЭС-3 станциясида олиб борилган модернизация жараёнлари якунлари ҳамда ушбу ГЭСнинг ишга туширилишига бағишланган тадбир бўлиб ўтди. Бу ҳақда Энергетика вазирлиги хабар берди.
Қайд этилишича, 1933 йилда қурилган мазкур ГЭСнинг ўрнатилган умумий қуввати 13,2 мегаваттдан иборат. Қарийб 85 йилдан буён ишлаб келаётган ГЭСнинг 4 та агрегати ишлаш қувватини самарадорлигини йўқотиб, таъмирга муҳтож бўлиб қолган эди.
Мазкур ГЭСни модернизация қилиш Ўзбекистон Президенти томонидан 2017 йилда қабул қилинган тегишли қарори асосида амалга оширилган. 2017 йилнинг декабрь ойида белгиланган лойиҳа асосида қурилиш ишлари бошланган. Қарийб уч йил мобайнида ГЭСда инвестициявий лойиҳалар асосида босқичма-босқич модернизация ишлари олиб борилди.
Режа асосидаги модернизация ишлари мобайнида ГЭСда қурилиш-монтаж, техник қурилмаларни йиғиш ва ўрнатиш, эҳтиёт қисмларни бутлаш ишлари олиб борилган.
Асосий гидротехник жиҳозлар Хитойнинг Dongfang Electric International Corporation компанияси томонидан ишлаб чиқилган. Ушбу техник жиҳозлаш, техник қурилмаларни йиғиш, эҳтиёт қисмларни бутлаш ишлари хорижий ва маҳаллий мутахассислар томонидан амалга оширилди.
Лойиҳалаштириш ишлари тизим ташкилоти ҳисобланган «Гидропроект» акциядорлик жамиятининг мутахассислари томонидан бажарилди. Яна бир тизим ташкилоти ҳисобланган «Сувсаноатмаш» компанияси томонидан модернизация жараёнида ишлатиладиган зарур техник жиҳозлар етказиб берилди. Шунингдек, «Ўзбекгидроэнергоқурилиш» компанияси томонидан ўзига ажратилган объектларда қурилиш ишлари амалга оширилди.
Модернизация ишлари якунланганидан сўнг ГЭСнинг умумий қуввати 15,34 мегаваттга етказилди. ГЭСнинг йиллик ўртача электр энергияси ишлаб чиқариш кўрсаткичи 124 миллион киловатт/соатга етказилиши кўзда тутилмоқда.
Изоҳ (0)