Хоразм вилоятининг Ҳазорасп туман ҳокимлиги қурилиш бўлими етакчи мутахассиси 8 минг доллар пора билан қўлга олинди. Бу ҳақда «Дарё»га Бош прокуратура ҳузуридаги иқтисодий жиноятларга қарши курашиш департаменти вилоят бошқармаси хабар берди.
Ҳокимлик қурилиш бўлими мутахассисининг қилмиши Бош прокуратура ҳузуридаги иқтисодий жиноятларга қарши курашиш департаменти вилоят бошқармаси Ҳазорасп туман бўлими ҳамда туман ДХХ ходимлари ҳамкорлигида ўтказилган тезкор тадбирда фош этилган.
Қайд этилишича, ходим Ҳазорасп туманида яшовчи фуқарога Тупроққалъа туманининг «Обод» маҳалласида жойлашган туман ҳокимлиги захирасидаги бўш ер майдонидан 1200 кв/метр ер майдонини ажратиш эвазига 8 минг доллар пора талаб қилган. Фуқаро эса бу ҳақда ҳуқуқни муҳофаза қилувчи органларга мурожаат қилган.
Аризага асосан ўтказилган тезкор тадбирда туман ҳокимлиги мутахассиси фуқародан ер майдонини ажратиш эвазига ўзи талаб қилган пулни олаётган вақтида ашёвий далил билан қўлга олинган.
Ҳозирда мазкур ҳолат юзасидан тергов ҳаракатлари олиб борилмоқда.
Эслатиб ўтамиз, аввалроқ Чилонзор ҳокимлиги бўлим бошлиғи 50 минг доллар пора билан ушланганди. Кейинчалик ишга Тошкент шаҳар ҳокимлиги ходими ҳам алоқадорлиги маълум бўлганди.
Изоҳ (0)