Тошкент шаҳар ИИББ ходимлари ҳамда прокуратура вакиллари ҳамкорлигида ўтказилган тезкор тадбир давомида пойтахтда 3 ойлик чақалоғини сотмоқчи бўлган аёл қўлга олинди. Бу ҳақда Тошкент шаҳар ИИББ ахборот хизмати хабар берди.
Маълумотларга кўра, ИИББга бир аёл мурожаат қилиб, пойтахтда истиқомат қилувчи 21 ёшли Н.Ф. ўзининг 3 ойлик боласини 5 минг АҚШ долларига сотаётганини маълум қилган.
Ҳуқуқ-тартибот органлари вакиллари томонидан тезкор тадбирлар ишлаб чиқилиб, уни амалга оширишга киришилган. Натижада Н.Ф. ва у билан бирга яшовчи, 24 ёшли А.З. чақалоқ эвазига пул олаётганида ушланган.
Таъкидланишича, ҳолат юзасидан тўпланган материаллар қонуний чоралар кўрилиши учун Юнусобод тумани прокуратурасига топширилган.
Аввалроқ Сирдарё вилоятининг Гулистон шаҳрида бир ойлик чақалоқни 18 минг долларга сотмоқчи бўлган аёллар қўлга олинганди. Навоийда эса 23 кунлик чақалоғини 3 миллион сўмга сотмоқчи бўлган аёлга жиноий иш очилган. 14 июль куни Сурхондарёда фарзандини қонуний йўл билан бошқа аёлга беришдан бош тортиб, уни сотмоқчи бўлган аёл ушланган.
Изоҳ (0)